Gujarati News

અમદાવાદ, તા.૬ : પ્રાઈવેટ સ્કૂલો ઓનલાઈન ક્લાસ માટે ફી વસૂલી શકે નહીં તેવા રાજ્ય સરકારના નિર્ણય સામે ગુજરાત હાઈકોર્ટે બુધવારે નોંધ્યું કે કોરોનાની આ મહામારીના સમયમાં ઓનલાઈન બાળકોને ભણાવી રહેલા શિક્ષકોના પ્રયાસોને નકારી શકાય નહીં અને તેમને તેમના સમય અને સેવા બદલ યોગ્ય વળતર મળવું જોઈએ. હાઈકોર્ટે એમ પણ કહ્યું કે, પ્રાઈવેટ સ્કૂલોએ બસ સર્વિસ, સ્પોર્ટ્સ, એન્ટરટેઈનમેન્ટ જેવી અન્ય વધારાની ફી ન વસૂલવી જોઈએ અને આગામી થોડા મહિનાઓ માટે 'નોન-પ્રોફીટ અભિગમ' અપનાવવો જોઈએ. કારણ કે ઘણા લોકોએ પોતાની નોકરી ગુમાવી દીધી છે અને હજારો અન્ય ઓછા પગારમાં કામ કરી રહ્યા છે, સ્કૂલોએ આ બાબતને પણ ધ્યાનમાં લેવી જોઈએ. હાઈકોર્ટે આ અવલોકન પર પોતાનો નિર્ણય આપ્યો અને પ્રાઈવેટ સ્કૂલો બંધ રહે ત્યાં સુધી ફી ઉઘરાવવા માટે પ્રતિબંધ મૂકવાના રાજ્ય સરકારના નિર્ણયને પણ નકારી દીધો.

               ચીફ જસ્ટિસ વિક્રમ નાથ અને જસ્ટીસ જે.બી પારડીવાળાની બેન્ચે આદેશ કર્યો કે રાજ્ય સરકાર અને સેલ્ફ-ફાઈનાન્સ સ્કૂલ અસોશિયેશન સાથે બેસીને ચર્ચા વિચારણા કરે. અને સરકારને આદેશ આપ્યો કે નાણાંકીય સમસ્યા મામલે સ્કૂલ મેનેજમેન્ટ અને પેરેન્ટ્સ બંને તરફનું બેલેન્સ હોવું જરૂરી છે. કોર્ટે કહ્યું કે, હાલની સ્થિતિને જોતા બાળકોને પોષાય તેવી કિંમતે શિક્ષણ મળવું જોઈએ અને સ્કૂલો પણ ચાલું રહેવી જોઈએ. પ્રાઈવેટ સ્કૂલોએ ફી ન માગવી જોઈએ તે કહેવું ઘણું થઈ જશે. કોર્ટે બંને પક્ષોને ફી અને ક્યાં સુધી ઓનલાઈન શિક્ષણ ચાલશે જેવા ૧૦ મુદ્દાઓ પર સાથે બેસીને ચર્ચા કરવા કહ્યું. વાટાઘાટો બાદ સરકાર નવો ઠરાવ જાહેર કરી શકે છે. હાઈકોર્ટે સ્વીકાર્યું આ સમયમાં શિક્ષકો માટે ઓનલાઈન ક્લાસને લઈને વિદ્યાર્થીઓનો અભ્યાસ મેનેજ કરવો ખૂબ મુશ્કેલ કામ છે. એક વ્યક્તિ તરીકે તેમની મહેનત અને પ્રયાસોનો અસ્વીકાર ન કરી શકાય. પ્રોફેશનલ તરીકે તેમને પોતાના સમય અને સર્વિસ માટે પૈસા મળવા જોઈએ. આથી સ્કૂલો ઓનલાઈન ક્લાસ માટે વ્યાજબી ટ્યુશન ફી લે તે સમજી શકાય છે. પેરેન્ટ્સે પણ સમજવું જોઈએ કે ઓનલાઈન શિક્ષણ વ્યર્થ નથી અને તેમણે જરૂરી રકમ ચૂકવવી જોઈએ.