Gujarati News

રાજકોટ તા. ૬ : સોમવારથી રાજકોટ સહિત રાજ્યભરના ધાર્મિક સ્થળો - મંદિરો - મહાદેવ તથા જગદંબાના વિખ્યાત મંદિરો, વિખ્યાત આશ્રમો, સંતો - મહંતોના મંદિરો ખૂલશે અને ધમધમશે, બરોબર ૭૫ થી ૮૦ દિવસ બાદ લોકો જે તે મંદિરોમાં જઇ માથુ ટેકવી દર્શન કરશે.

આ માટે કેન્દ્રના ગૃહખાતાએ ત્રણ દિવસ પહેલા મંદિરો કેમ ખોલવા તે અંગેની સ્પેશ્યલ ગાઇડલાઇન બહાર પાડી છે.

આ ગાઇડલાઇનના અનુસંધાને આજે બપોરે ૧૨ વાગ્યાથી રાજ્યના મુખ્યમંત્રી શ્રી વિજયભાઇ રૂપાણી દરેક જિલ્લાના મુખ્ય ધાર્મિક સ્થળોના ટ્રસ્ટી કે ગાદિપતી કે મુખ્ય મહંત - પૂજારી સાથે ખાસ વિડિયો કોન્ફરન્સ યોજી ખાસ માર્ગદર્શન આપશે, મંદિરોના વડાઓ પાસેથી સમસ્યા જાણશે, નિરાકરણ કરશે અને ગાઇડ લાઇન આપશે.

આ વીસી સંદર્ભે રાજકોટ કલેકટર તંત્ર દ્વારા વિશ્વભરમાં વિખ્યાત અને અબજો લોકોની આસ્થા જેમાં સમાયેલી છે, તે વીરપુર જલારામ બાપાના મંદિરના મુખ્ય ગાદિપતીને ખાસ વીસીમાં બોલાવ્યા છે.

આવી જ રીતે અંબાજી મંદિર - સોમનાથ મહાદેવ સહિત દરેક જિલ્લામાં કલેકટરો દ્વારા પોતાના જિલ્લામાં આવેલા મોટા મંદિરોના ટ્રસ્ટીઓ - ગાદિપતિઓને વીસી માટે બોલાવ્યા છે. આ વીસી બાદ કલેકટર દ્વારા મંદિરો ખોલવા અંગે ખાસ જાહેરનામુ પણ બહાર પડનાર હોવાનું સૂત્રોએ ઉમેર્યું હતું.