Gujarati News

અમદાવાદ: શહેર ટ્રાફિક પોલીસે પ્રથમ વખત BRTS કોરિડોરમાં વાહન ચલાવતા લોકો સામે 43 FIR દાખલ કરી છે. BRTS કોરિડોરમાં વાહન ચલાવવાની પરવાનગી માત્ર BRTS, AMTS, GSRTC અને ઈમરજન્સી વ્હીકલ્સને જ આપવામાં આવી છે. પોલીસે નોંધેલી 43 FIRમાં 28 ફોર-વ્હીલર, 12 ટુ વ્હીલર, કડીની એક સ્કૂલ બસ અને બે રિક્ષાચાલકોનો સમાવેશ થાય છે.

DCP ટ્રાફિક (ઈસ્ટ) અક્ષય રાજે કહ્યું કે, “આ પ્રકારે પ્રથમવાર FIR દાખલ કરવામાં આવી છે. નિયમોનો ભંગ કરનારા લોકો સામે IPCની કલમ 270 (ઝડપથી વાહન ચલાવવું), કલમ 188 (જાહેર સેવકે બહાર પાડેલા આદેશનો અનાદર) સહિત મોટર વ્હીકલ્સ એક્ટની પણ કેટલીક કલમો હેઠળ ગુનો નોંધવામાં આવ્યો છે.” B ડિવિઝન ટ્રાફિક પોલીસ ઈન્સ્પેક્ટર કે.ડી. નકુમે કહ્યું કે, “આ પ્રથમ વખત છે જ્યારે BRTS કોરિડોરમાં ડ્રાઈવિંગ કરનારા વાહનચાલકો સામે IPCની કલમો હેઠળ ગુનો નોંધાયો હોય. અગાઉ પોલીસ ફક્ત તેમના વાહનો જપ્ત કરતી હતી.”

ટ્રાફિક પોલીસે BRTS કોરિડોરમાં ડ્રાઈવિંગ કરનારા વાહનચાલકોના વાહનો જપ્ત કર્યા છે. વાહનચાલકોએ વાહનો પરત મેળવવા માટે કોર્ટમાં હાજર થવું પડશે. પોલીસે કારના કાચ પર લગાવેલી ફિલ્મ કઢાવવાની ઝુંબેશ શરૂ કરી છે, જે અંતર્ગત 392 કારના કાચ પરથી ફિલ્મ ઉતારવામાં આવી છે. આ કાર માલિકો પાસેથી પોલીસે કુલ 41,000 રૂપિયાનો દંડ વસૂલ્યો છે.