Gujarati News

Gujarati News

News of Friday, 4th December 2020

સાણંદમાં દલિત યુવકને ૫ શખ્સોએ ઢોર માર માર્યો

સાણંદ જીઆઈડીસીનો બનાવ : શર્ટના બટન ખુલ્લા રાખવા ઉપર અને દરબારની અટક હોવાના કારણે તેને માર મારવામાં આવ્યો હોવાની ફરિયાદ

અમદાવાદ,તા.૪ : સાણંદ જીઆઈડીસીમાં ઓટો પાર્ટ્સ બનાવતી કંપનીમાં કામ કરતા એક દલિત યુવકને તેની સાથે કામ કરતા વ્યક્તિએ ચાર અન્ય લોકો સાથે ભેગા મળી ફટકાર્યો હોવાની પોલીસ ફરિયાદ નોંધાઈ છે. ભરત જાધવ નામના યુવકે નોંધાવેલી ફરિયાદ અનુસાર, શર્ટના બટન ખુલ્લા રાખવા પર અને દરબારની અટક હોવાના કારણે તેને માર મારવામાં આવ્યો હતો. ફરિયાદી મૂળ ગીર-સોમનાથ જિલ્લાનો વતની છે. પોતાની સાથે કામ કરતા નરેન્દ્ર રાજપૂત નામના શખ્સ વિરુદ્ધ નોંધાવેલી ફરિયાદમાં તેણે જણાવ્યું છે કે ફેક્ટરીમાં શિફ્ટ પૂરી થયા બાદ નરેન્દ્ર અને તેની સાથે રહેલા ચાર શખ્સોએ તેને ઢોર માર માર્યો હતો. મંગળવારે બનેલી આ ઘટનામાં ભરત ફેક્ટરીએ જતો હતો ત્યારે જાધવે તેને રોકીને શર્ટના બટન કેમ ખૂલ્લા રાખ્યા છે તેવો સવાલ કર્યો હતો. ભરતે બટન બંધ કરી દીધા બાદ નરેન્દ્રએ ભરતને તે કયા ગામનો છે અને તેની અટક શું છે તે સવાલ કર્યો હતો. જેના જવાબમાં જાધવે પોતાની અટક અને ગામની વિગતો આપી હતી.

           જાધવ અટક સાંભળીને નરેન્દ્રએ ભરતને સવાલ કર્યો હતો કે તે દરબાર છે કે શું? જેના જવાબમાં ભરતે કહ્યું હતું કે તે દલિત છે. આ સાંભળતા જ નરેન્દ્ર ગુસ્સે ભરાયો હતો, અને દલિત હોવા છતાં જાધવ અટક કઈ રીતે રાખે છે તેમ કહી ભરતને ધમકાવ્યો હતો. નરેન્દ્રને શાંત કરવા ભરતે તેને કહ્યું હતું કે તમે મારા ભાઈ જેવા છો. જે સાંભળીને નરેન્દ્રને વધુ ગુસ્સો ચઢ્યો હતો. ત્યારબાદ તેણે ભરતને શિફ્ટ પૂરી થાય પછી બહાર મળવા માટે કહ્યું હતું. નોકરી પૂરી થયા બાદ ભરત ફેક્ટરીની બહાર નીકળ્યો ત્યારે નરેન્દ્ર અને તેની સાથે બીજા ચાર શખ્સો તેની રાહ જોઈને ઉભા હતા. તેમણે ભરતને જોતા જ તેને પકડીને દલિત હોવા છતાં તે મને ભાઈ કહેવાની હિંમત કઈ રીતે કરી તેવું કહીને તને ફટકારવાનું ચાલુ કર્યું હતું. પોતાની ફરિયાદમાં ભરતે જણાવ્યું છે કે નરેન્દ્ર અને તેની સાથેના ચાર લોકોએ તેને ઢોર માર મારીને ત્યાં જ છોડી દીધો હતો. આ ઘટના બન્યા બાદ ભરત બસમાં બેઠો હતો, અને સાણંદ પોલીસ સ્ટેશન પહોંચ્યો હતો. જોકે, સાણંદ પોલીસ સ્ટેશને તેની ફરિયાદ લેવાનો ઈનકાર કરીને તેને સાણંદ જીઆઈડીસી પોલીસ સ્ટેશને જવાનું કહેવામાં આવ્યું હતું. કાયદા અનુસાર, કોઈપણ પોલીસ સ્ટેશન ઝીરો કમ્પ્લેન દાખલ કરી તેને લાગતા-વળગતા પોલીસ સ્ટેશનમાં ફોરવર્ડ કરી શકે છે. જોકે, તેમ છતાંય ભરતને સાણંદ જીઆઈડીસી પોલીસ સ્ટેશન જવા માટે કહેવાયું હતું.

(7:42 pm IST)
  • મોસ્કોમાં એક સાથે કોવિદ વેકિસન આપવા જબ્બર તૈયારીઓ : શનિવારથી રશિયાના મોસ્કો ખાતે સમગ્ર શહેરમાં કોવિડ વેકિસન સેન્ટરો ઉભા કરવામાં આવશે, તે સાથે જ મોસ્કોમાં એકસાથે કોરોના વેકસિન આપવાનું ભગીરથ કાર્ય હાથ ધરાશે. access_time 10:46 am IST

  • દિલ્હીમાં સીબીઆઈના દરોડા:દિલ્હીમાં જય પોલીકેમ ઇન્ડિયા લિમિટેડ કંપની ઉપર સીબીઆઈએ મોટાપાયે દરોડા પાડ્યા છે. access_time 11:57 pm IST

  • સાહિત્યકાર ઝવેરચંદ મેઘાણીના પુત્ર જયંત મેઘાણીનું દુઃખદ નિધન : જાણીતા સાહિત્યકાર ઝવેરચંદ મેઘાણીના પુત્ર જયંત મેઘાણીનું આજે ભાવનગર મુકામે દુઃખદ નિધન થયુ છે : તેઓ ૮૩ વર્ષના હતા : કોમ્પ્યુટર ઉપર કામ કરી રહ્યા હતા ત્યારે અંતિમ શ્વાસ લીધા access_time 3:20 pm IST