Gujarati News

રાજકોટ, તા., ૪: લોકડાઉનનો કડક અમલ કરાવી લોકોને કોરોના વાયરસ જેવી  જીવલેણ બિમારીથી બચાવવા માટે તંત્ર પોતાના અને પોતાના પરિવારના જાનના જોખમે ફરજ બજાવતી હોવા છતા કેટલાક ચોક્કસ લોકો આવી ગંભીર પરિસ્થિતિને મજાક સમજતા હોય તેમ રસ્તા પર એક યા બીજા બ્હાને નિકળી અન્ય લોકોના જીવ પર પણ ખતરો ઉભા કરતા હોવાથી રાજયના પોલીસ વડા શિવાનંદ ઝા દ્વારા કાયદાનું ખુલ્લેઆમ ઉલ્લંઘન કરતા લોકો સામે આકરા પગલા લેવાના આપેલા આદેશનો વડોદરાના પોલીસ કમિશ્નર અનુપમસિંહ ગેહલોતે વારંવાર ચેતવણી છતા બહાર નિકળતા શખ્સોના પાસપોર્ટ કાયમી ધોરણે રદ કરવા માટેની કાર્યવાહીની આકરી ચેતવણી આપતા  ખળભળાટ મચી ગયો છે.

સુત્રોમાંથી સાંપડતા નિર્દેશ મુજબ જેઓ પાસે હજુ સુધી પાસપોર્ટ નથી પરંતુ પાસપોર્ટ મેળવવા માટે અરજીઓ કરી છે તેવા લોકોની અરજીઓ નામંજુર કરવા પણ પાસપોર્ટ વિભાગને પોલીસ કમિશ્નર દ્વારા પત્ર પાઠવવામાં આવ્યો છે. પોલીસ કમિશ્નર દ્વારા આ સિવાય પણ અન્ય કેટલાક સખત કદમ ઉઠાવવા સાથોસાથ ડીઝાસ્ટર મેનેજમેન્ટ એકટની વિવિધ જોગવાઇ હેઠળ પગલા લેવાની દિશામાં કાર્યવોહી કરવા ટોચના પોલીસ અધિકારીઓની બેઠકમાં આદેશ આપવામાં આવ્યો છે.

દરમિયાન કોરોના વાયરસ જેવી ગંભીર પરિસ્થિતિમાં પણ ચોક્કસ લોકો આ વાતને મજાક બનાવી કે પરિસ્થિતિની ગંભીરતા સમજયા વગર ઉંટવૈદા જેવા ઉપાયો સુચવી રહયા છે. તે દિશામાં પણ આકરી કાર્યવાહી કરવાના ભાગરૂપે પીપળાના પાનના સેવનથી કોરોના વાયરસ ફેલાતો અટકી રોગ દવા વગર મટી જતો હોવાના ભ્રમ ફેલાવતા ભ્રામક પોસ્ટ સોશ્યલ મીડીયા પર મુકનાર  શખ્સને શોધી તેની સામે આકરા પગલા ભરવા પણ પોલીસ કમિશ્નર અનુપમસિંહ ગેહલોત દ્વારા ક્રાઇમ બ્રાન્ચને આદેશ અપાયો છે.