Gujarati News

Gujarati News

News of Thursday, 3rd December 2020

શિક્ષકો માર્કેટિંગ-ગૃહ ઉદ્યોગ જેવા કામ કરવા મજબૂર થયા

કોરોના વાયરસના કારણે હાલત ખરાબ : બાળકોના ભવિષ્યના ઘડતરમાં મહત્ત્વનો રોલ અદા કરનારા શિક્ષકોનું વર્તમાન અને ભાવિ કોરોનાના કારણે ખતરામાં

અમદાવાદ,તા.૩ : કોરોના વાયરસના કપરા સમયે ભલભલા લોકો માટે આર્થિક મુશ્કેલી સર્જી છે. તેમાં પણ બાળકોના ભવિષ્યના ઘડતરમાં મહત્ત્વનો રોલ અદા કરનારા શિક્ષકોનું વર્તમાન અને ભાવિ આ કોરોનાના કારણે ખતરામાં સપડાયા છે. ખાસ કરીને શાળાઓમાં ખાનગી શિક્ષક તરીકે કામ કરતા શિક્ષકો અને ટ્યુશન કરતા શિક્ષકોની કારકિર્દી પર પૂર્ણવિરામ મૂકાઈ ગયું છે. આ સમયે વાત છે એવા શિક્ષકોની કે જેઓ આઠ મહિના પહેલા ટ્યુશન ચલાવી રોજીરોટી કમાતા હતા પણ લૉકડાઉન અને ત્યારબાદ બાદની સ્થિતિને તાબે થઈને કોઈએ પ્રિન્ટિંગ, કોઈએ મલ્ટીલેવલ માર્કેટિંગ તો કોઇએ ખાખરા-ચવાણા જેવા ગૃહઉધોગ તરફ વળવું પડ્યું છે. શહેરના નિર્ણયનગર વિસ્તારમાં રહેતા હાર્દિકભાઈ શાહ વર્ષોથી ટ્યુશન કલાસ ચલાવે છે. ટ્યુશન કલાસ રેગ્યુલર ચાલતા હતા ત્યાં સુધી બધું બરાબર હતું પણ કોરોનાને કારણે હજુ સુધી કલાસ બંધ રહેતા તેઓએ ગ્રાફિક્સ પ્રિન્ટિંગના ધંધામાં નસિબ અજમાવવું પડ્યું છે.

              ટ્યુશન કલાસ નહીં ખુલતા આર્થિક સ્થિતિ કફોડી થઈ ગઈ છે. તેઓએ વર્ષોથી જમાવેલા ટયુશન ક્લાસના ધંધામાંથી અન્ય ધંધા તરફ વળવું પડ્યું છે. જોકે, નવા ધંધામાં સેટ થતા પણ તેમને વાર લાગશે પરંતુ ખરાબ સમય નીકળી જશે પછી બધું બરાબર થઈ જશે તેવી તેમને આશા છે. માત્ર હાર્દિકભાઈ શાહ જ નહીં વ્યાસવાડી પાસે રહેતા ટ્યુશન ક્લાસના શિક્ષક મેહુલભાઈ ચૌહાણની પણ આવી જ હાલત છે. વર્ષોના વર્ષો વિદ્યાર્થીઓને ભણાવવામાં કાઢ્યા બાદ હવે કોરોનાએ એ પણ છોડાવી દીધુ. વિદ્યાર્થીઓને ભણાવવાના કલાસ અને પટલીઓ ધૂળ ખાય છે. શિક્ષણ કાર્ય બંધ થતાં તેમણે ઘરમાં જ ખાખરા-ચવાણા અને ગૃહઉધોગની નાની દુકાન કરી છે. તેઓનું કહેવું છે કે આ દુકાનથી આર્થિક સદ્ધરતા તો નહીં આવે પણ પરિવારનું ગુજરાન ચાલશે. ભૂખ્યા નહીં ઊંઘવું પડે. તેમના જ ગ્રુપના ૨૭ જેટલા કલાસીસ શિક્ષકોએ ટ્યુશન ક્લાસનો ધંધો બંધ કરી દીધો છે. તેઓ એવી પણ અપીલ કરે છે જો કોરોનાનો આ કપરો સમય કાઢી લેશો તો સારો સમય આવશે. મહત્ત્વનું છે કે કોરોનાએ લોકોની કારકિર્દી ભરખી લીધી હોય. આવા આ માત્ર બે જ નહીં પરંતુ અનેક ઉદાહરણો છે. અમદાવાદમાં ૧૫ હજારથી વધુ ટ્યુશન ક્લાસીસ છે. જેમાથી અનેક ક્લાસ ભાડા પર ચાલે છે. લૉકડાઉન બાદ ધંધો જ બંધ હોય તો ભાડું પણ કેવી રીતે ભરી શકવાના? આ કારણે અનેક ક્લાસ બંધ થઈ ગયા છે.

(7:14 pm IST)
  • દેશમાં કોરોનાના કેસનો આંકડો 95 લાખને પાર પહોંચ્યો : નવા કેસ કરતા સ્વસ્થ થનારની સંખ્યામાં સતત વધારો : એક્ટિવ કેસમાં ઘટાડો : રાત્રે 10-30 વાગ્યા સુધીમાં કોરોનાના નવા 31,357 કેસ નોંધાયા:કુલ કેસની સંખ્યા 95,31,109 થઇ :એક્ટીવ કેસ 4,22,347 થયા : વધુ 36,099 દર્દીઓ સ્વસ્થ થતા કુલ 89,67,902 રિકવર થયા :વધુ 467 લોકોના મોત સાથે કુલ મૃત્યુઆંક 1,38,627 થયો access_time 12:09 am IST

  • હરિયાણા પૂર્વ મુખ્યમંત્રી ઓ પી ચૌટાલા ને કોરોના પોઝિટિવ આવતા તેમને દિલ્હી-ગુડગાવની મેંદાંતા હોસ્પિટલમાં દાખલ કરવામાં આવ્યા છે access_time 12:04 am IST

  • સંયુક્ત રાષ્ટ્ર સંઘે " ભાંગ " ને દવા તરીકે માન્યતા આપી : ભાંગમાં રહેલા ગુણોને ધ્યાને લઇ વિશ્વ સ્વાસ્થ્ય સંઘે નશીલા દ્રવ્યોની યાદીમાંથી દૂર કરી : મતદાન કરાતા ભાંગને ઔષધી તરીકે માન્યતા મળી : દવા સિવાય માત્ર નશા માટેનો ઉપયોગ ગેરકાયદે ગણાશે access_time 11:46 am IST