Gujarati News

રાજકોટ, તા., ૨: વડોદરા જીલ્લાના વાઘોડીયાના મહિલા તાલુકા વિકાસ અધિકારી શ્રીમતી કામીનીબેન પંચાલ શૌચાલયના કામનું બીલ મંજુર કરવા માટે ૪ બીલના ર ટકા લેખે રૂ.ર૪ હજારની લાંચની માંગણી કરી તે સ્વીકાર કરતા એસીબી છટકામાં ઝડપાયેલા આ મહિલા અધિકારીની ધરપકડ તથા તેમના આણંદ સ્થિત બંગલામાં એસીબી ટીમો દ્વારા સર્ચ ઓપરેશન હાથ ધરાયાનું સુત્રો જણાવે છે.

એસીબી સમક્ષ આ ગુન્હાના ફરીયાદીએ  કાશીપુરા ગ્રામ પંચાયતના શૌચાલયોનું કામ પુર્ણ થઇ જતા તેના બીલ મુકેલ. આરોપી મહિલા ટીડીઓએ રૂ. ૭ હજારની લાંચ માંગી અને સ્વીકાર કરેલ ત્યાર બાદ ફરીયાદીએ જુદી જુદી ગ્રામ પંચાયતના રોજના કામોના બીલ, પ્રોટેકશન દિવાલ તથા શૌચાલયના બીલો મુકતા ર ટકા લેખે  ર૪ હજારની લાંચની માંગણી કરી હતી. ફરીયાદીના આરોપ મુજબ તેઓ લાંચની રકમ આપવા માંગતા ન હોય આ બાબતે એસીબીનો સંપર્ક કરતા વડોદરા શહેર એસીબી પીઆઇ આર.એન.રાઠવાએ વડોદરા એસીબી એકમના મદદનીશ નિયામક બી.જે.પંડયાના માર્ગદર્શનમાં છટકુ ગોઠવી ઝડપી  લીધા હતા.