Gujarati News

અમદાવાદ :વડાપ્રધાન મોદી બે દિવસીય ગુજરાતની મુલાકાતે છે. અંબાજી ખાતે તેમણે રૂ. 7200 કરોડથી વધુના મૂલ્યના વિવિધ પ્રોજેક્ટનો શિલાન્યાસ કર્યો હતો. આ દરમિયાન તેમણે જાહેરાત કરી કે કેન્દ્ર સરકાર દ્વારા મફત રાશનની યોજનાને આગળ ધપાવવામાં આવી રહી છે. આ સાથે તેમની સરકારની દરેક યોજનાના કેન્દ્રમાં મહિલાઓ હોવાનું જણાવવામાં આવ્યું છે.

પીએમ મોદીએ કહ્યું કે, આ તહેવારોની સિઝનમાં ગરીબ પરિવારની બહેનોને તેમનું રસોડું ચલાવવામાં મુશ્કેલી ન પડે, તેથી સરકારે મફત રાશન યોજનાને લંબાવી છે. દેશના 80 કરોડથી વધુ સાથીઓને મુશ્કેલીના સમયમાં રાહત આપતી આ યોજના પર કેન્દ્ર સરકાર લગભગ 4 લાખ કરોડ રૂપિયાનો ખર્ચ કરી રહી છે. સાથે જ કહ્યું કે  દરેક ઘરમાં શૌચાલય, ગેસ કનેક્શન, પાણી હોવું જોઈએ, જન ધન ખાતું હોવું જોઈએ, મુદ્રા યોજના હેઠળ ગેરંટી વિના લોન હોવી જોઈએ, કેન્દ્ર સરકારની દરેક મોટી યોજનામાં દેશની મહિલા શક્તિ કેન્દ્રમાં છે.

પીએમ મોદીએ દાવો કર્યો કે અત્યાર સુધી અમારી કેન્દ્ર સરકારે દેશમાં 3 કરોડથી વધુ ઘર બનાવ્યા છે અને અમે ગરીબોને આપ્યા છે. આમાંના મોટાભાગના મકાનો માતા અને બહેનોની માલિકીના છે. સાથે જ તેમણે કહ્યું કે છેલ્લા બે દાયકાના સતત પ્રયાસોને કારણે બનાસકાંઠાનું ચિત્ર બદલાયું છે. પરિસ્થિતિ બદલવામાં નર્મદાના નીર, સુજલામ-સુફલામ અને ટપક સિંચાઈએ મોટી ભૂમિકા ભજવી છે