Gujarati News

સુરતઃ સોશ્યલ મીડિયાનો ઘણી વાર સારો ઉપયોગ થાય છે અને તેના કારણે પરિવારથી વિખુટા પડેલ સભ્યો પણ મળી જાય છે ત્‍યારે સુરતમાં અેક આવો જ કિસ્સો સામે આવ્યો છે.

તાજેતરમાં જ ફેસબુક થકી 11 વર્ષથી ખોવાયેલ યુવક પોતાના પરિવારને મળી શક્યો. 27 વર્ષના તેજપોલસિંહ ડાભી 11 વર્ષ પહેલા ઘરેથી ભાગી ગયા હતા જે સોમવારે ફરી તેમના પરિવારને મળી શક્યા. ત્યારથી જ તેઓ સુરતના રેલવે સ્ટેશન પાસેના કોહિનૂર કેફેમાં રસોઈયા તરીકે કામ કરતા હતા.

તેજપાલસિંહ ડાભી મૂળ ખેડા જિલ્લાના રતનપુર ગામના રહેવાસી છે. 2006માં જેઓ ત્યારે ધોરણ 11માં ભણી રહ્યા હતા ત્યારે પરિવારના સભ્યો જોડે કોઈ મુદ્દાને લઈને વિવાદ થયો હતો. જેને પગલે તેજપાલસિંહે ઘર છોડી દીધું હતું. ફેસબુક પેજ પર પોતાના દીકરાનો ફોટો જોઈને પરિજનો તેને ઓળખી ગયા હતા હતા. તેમણે સ્થાનિક પોલીસનો સંપર્ક કરીને તેમને તેજપાલનો ફોટો આપ્યો હતો.

સ્થાનિક પોલીસને જાણવા મળ્યું કે તે સુરતમાં છે માટે સુરત પોલીસને આ મામલે જાણ કરવામાં આવી હતી. સ્પેશિયલ ઓપરેશન ગ્રૂપની એક ટીમે સફળ રીતે તેજપાલનો પતો લગાવી લીધો હતો. ઉલ્લેખનીય છે કે તેજપાલ ઘરેથી એમ કહીને ગયો હતો કે તે વાળ કપાવવા જઈ રહ્યો છે અને પછી ક્યારેય પાછો ફર્યો જ નહોતો. પોલીસે કહ્યું કે તેજપાલે ફેસબુક પર પોતાની એક સેલ્ફી અપલોડ કરી હતી જેમાં રેલવે સ્ટેશન પાસેનું રેસ્ટોરાં પણ દેખાતું હતું.

તેજપાલસિંહ ડાભીએ ઘર છોડ્યા બાદ સૌથી પહેલા તે મુંબઈ ગયો હતો ત્યાં કોઈ રેસ્ટોરાંમાં કામ કર્યું હતું. થોડા મહિના પહેલા સુરત આવ્યો હતો તે અગાઉ તેણે વિવિધ જગ્યાઓએ કામ કરીને રસોઈ બનાવતાં શીખી હતી. જ્યારથી ડાભી ઘર છોડીને ભાગી ગયો ત્યારથી તેના મા મંગુએ ચપ્પલ પહેરવાનું છોડી દીધું હતું અને દિવસમાં એક જ વાર ભોજન લેતાં હતાં. કઠલાલ પોલીસ સ્ટેશને તેજપાલ ભાગી ગયો હોવાની ફરિયાદ નોંધવામાં આવી હતી. તેજપાલના પિતા અમરસિંહ રિટાયર્ડ બસ કન્ડક્ટર છે અને તેના ત્રણ ભાઈ ખેતી કરે છે.