Gujarati News

અમદાવાદ, તા. ૧: અદાવાદના બહુચર્ચિત શિવરંજની હિટ એન્ડ રન કેસમાં શ્રમિક પરિવારને કચડનાર આરોપી પર્વ શાહને એક દિવસના રિમાન્ડ પર રાખવામાં આવ્યો હતો પરંતુ ત્યારબાદ પોલીસે વધુ રિમાન્ડની માંગણી ન કરતાં આરોપીને જ્યુડિશલ કસ્ટડીમાં કોર્ટે હુકમ કર્યો હતો. શિવરંજની ના હિટ એન્ડ રન કેસ માં પર્વ શાહ વિરૂદ્ધ આઈપીસી કલમ ૩૦૪ મનુષ્ય વધનો ગુનો દાખલ કર્યો છે. આ કલમ હેઠળ પર્વ શાહને આજીવન કેદ અથવા ૧૦ વર્ષની સજા પણ થઇ શકે છે. અત્રે ઉલ્લેખનીય છે કે પર્વ સાથે જે કાર હતી તેની નજીક પોલીસ પહોંચી ગઇ છે. હોમગાર્ડ અને અન્ય પોલીસ કર્મચારીઓ નિવેદનને લઇને તપાસ શરૂ કરાઇ છે. ઘટનાના રિકન્સ્ટ્રકશન માટે અને રિમાન્ડ દરમિયાન પર્વ શાહ સહયોગ નહી આપે તો વધુ રિમાન્ડ માંગવામાં આવશે.

બીજી બાજુ પર્વ અને તેના ૩ મિત્રો કર્ફ્યૂમાં નીકળ્યા હોવાથી ચારેય સામે જાહેરનામા ભંગનો ગુનો નોંધી તેના ત્રણ મિત્રોની પણ ધરપકડ કરવામાં આવી છે. સેટેલાઈટ પોલીસે પર્વ શાહ તથા તેના અન્ય ૩ મિત્રોને પોલીસ સ્ટેશનમાં હાજર કર્યા હતા, જે તમામ પર્વ શાહ સાથે અકસ્માત બાદ ભાગી છૂટ્યા હતા. હાલ પોલીસ આ તમામ યુવકોની પૂછપરછ કરી રહી છે. પોલીસે ત્રણેય મિત્રોની બે કલાક સુધી પૂછપરછ કરી હતી. ચારેય લોકો સામે ૧૮૮ જાહેરનામા ભંગનો ગુનો નોંધ્યો છે. ૩૦૪ની કલમ ઉમેરવા માટેનો રિપોર્ટ કોર્ટમાં કરાયો છે. પોલીસે ત્રણેયને અલગ અલગ બેસાડીને તેમના નિવેદન નોંધાયા હતા.