18 વર્ષ પછી સુનિલ શેટ્ટી ગીત ગાશે
મુંબઈ: સિનિયર અભિનેતા સુનીલ શેટ્ટી અઢાર વર્ષના ગાળા બાદ ફરી એકવાર ગીતો ગાશે એવી જાણકારી મળી હતી. અત્યાર અગાઉ એણે ૨૦૦૦ની સાલમાં બાળગીતો ગાઇને એક આલ્બમ રિલિઝ કર્યું હતું. કસરતા કાયા ધરાવતા સુનીલે કેટલીક એક્શન ફિલ્મોમાં જોરદાર રોલ કર્યા હતા. બુધવારે એણે આ ગીતનું વિડિયો શૂટિંગ કર્યું હતું. આ ગીત વિશે માહિતી આપતાં એણે કહ્યું કે આ ખરેખર તો એક જિંગલ છે જે ટૂંક સમયમાં રેડિયો પર સાંભળવા મળશે. આ જિંગલ વિશે બોલતાં એણે કહ્યું કે આ જિંગલના શબ્દો આ પ્રકારના છે - 'બોલિવૂડ, કોલિવૂડ, ટોલિવૂડ, મોલીવૂડ, સુનો, ઇન્ડિયન ફિલ્મ કે ચાહનેવાલે, હમ હૈં શોબીઝ ઇન્ડિયાવાલે...' એણે એવો દાવો કર્યો હતો કે હું લયમાં બહુ કાચો છું એટલે વારંવાર તાલ ચૂકી જાઉં છું. પરંતુ સંગીતકાર જોડી રાજ અને શબ્બીરે આ જિંગલ મારી પાસેજ ગવડાવવાનો આગ્રહ રાખ્યો હતો એટલે મેં ખૂબ રિહર્સલ્સ કર્યાં હતાં અને સંગીતકારોને સંતોષ થાય એવું ગાતો થયો હતો. કંઇક નવું કરવાની મારી ધગશ હતી એટલે મેં આ જિંગલનું કામ સ્વીકાર્યું હતું. તમે ફરી નવું આલ્બમ રિલિઝ કરશો કે એવા સવાલના જવાબમાં સુનીલ હસી પડયો અને કહે, લોકો દ્વારા મારા પર ઇંડાં ટમેટાંનો વરસાદ વરસાવવો હોય તો હું ગાવા તૈયાર છું. જો કે મારી પત્ની માના અને સંતાનો અથિયા તેમજ અહાનને મારું ગાયેલું ગમ્યું હતું.