વિશાલ ભારદ્વાજનો પુત્ર આસમાન પણ હવે ફિલ્મકાર બનશે

મુંબઈ:હીરોનો પુત્ર હીરો બને તો ફિલ્મ સર્જકનો પુત્ર ફિલ્મ સર્જક કેમ ન બને ? મોખરાના ફિલ્મ સર્જક સંગીતકાર વિશાલ ભારદ્વાજનો પુત્ર આસમાન પણ પિતાના માર્ગે ચાલીને હવે ફિલ્મ સર્જક બની રહ્યો છે.અગાઉ વિશાલે શાહિદ કપૂરને હીરો તરીકે લઇને કમીને ફિલ્મ બનાવી ત્યારે વિશાલના પુત્ર આસમાને પિતાના સહાયક તરીકે કામગીરી બજાવી હતી. એ અનુભવ હવે એને ફિલ્મ સર્જક તરીકે કામ લાગશે.વિશાલની પત્ની અને આસમાનની માતા રેખા ભારદ્વાજે કહ્યું કે હાલ આસમાન ન્યૂયોર્કમાં ફિલ્મ સર્જનની કલાના વિષયમાં અભ્યાસ કરી રહ્યો છે. આ અભ્યાસ પૂર્ણ થતાં અમે મે માસમાં એને ફિલ્મ સર્જક તરીકે લોંચ કરવાના છીએ.વિશાલે પત્નીની વાતમાં ઉમેરો કરતાં કહ્યું કે આજના દરેક ટીનેજરની જેમ આસમાનને પણ થ્રીલર ફિલ્મો બનાવવાનો ચસકો લાગેલો છે. એટલે એની પહેલી ફિલ્મ થ્રીલર હોય તો અમને નવાઇ નહીં લાગે. એનામાં પ્રતિભા તો છે એ મેં મારા અનુભવે જોયું છે. મારો પુત્ર છે માટે નથી કહેતો, મારી સાથે એ કામ કરતો હતો ત્યારે એનામાં રહેલી પ્રતિભાનો અનુભવ મેં જાતે કર્યો છે.