સેંસર બોર્ડે એકપણ કટ વગર પાસ કરી ફિલ્મ રેસ-3

મુંબઈ: સલમાન ખાનની મોસ્ટ અવેઈટેડ એક્શન થ્રિલર રેસ-૩ને સેંસર બોર્ડ તરફથી ક્લીન ચિટ મળી ચુકી છે અને સેંસર બોર્ડે ફિલ્મને યુ/એ સર્ટી આપી દીધુ છે. સુત્રોના જણાવ્યા મુજબ ફિલ્મમાં એકપણ કટ નથી લગાવવામાં આવ્યો. સેંસર બોર્ડનું કહેવુ છે કે આ મલ્ટીસ્ટારર ફિલ્મમાં એકપણ આપત્તિજનક દ્રશ્ય નથી. કહેવામાં આવ્યુ છે કે, ફિલ્મમાં એક્શન સીન્સના કારણે તેને યુ/એ સર્ટિફિકેટ આપવામાં આવ્યુ છે. રેમો ડિસુઝાની આ ડાયરેક્ટોરીયલ ફિલ્મ ઈદ પર રીલીઝ થવાની છે. 

 

ફિલ્મની ટાઈમિંગની વાત કરવામાં આવે તો ૨ કલાક ૪૦ મિનિટની આ ફિલ્મ છે, જેમાં સ્ટાર્ટ અને એન્ડનુ ક્રેડિટ પણ સામેલ છે. રેસ-૩માં સલમાન ખાન ઉપરાંત જેકલીન ફર્નાન્ડિસ, અનિલ કપુર, બોબી દેઓલ, ડેઝિ શાહ અને સાકિબ સલીમ જેવા કલાકારો નજરે પડશે. આપને જણાવી દઈએ કે, રેસ ફ્રેન્ચાઈઝીની આ ત્રીજી ફિલ્મ છે. ફિલ્મના મલ્ટિપલ ક્લાઈમેક્સને લઈને મીડિયામાં ખૂબ જ ચર્ચા છે. એવુ પણ કહેવામાં આવી રહ્યુ છે કે આ અંગે માત્ર સલમાન ખાન અને ફિલ્મ સાથે જોડાયેલ કેટલાક કલાકારને જ ખબર છે. 
ખાસ વાત તો એ છે કે, શાહરુખ ખાનની આગામી ફિલ્મ ઝીરોનુ નવુ ટીઝર પણ રેસ-૩ની પ્રિન્ટ સાથે રીલીઝ કરવામાં આવનાર છે. રેસ-૩ ૧૫ જુનના રોજ રીલીઝ થવાની છે જ્યારે શાહરુખ ખાનની ફિલ્મ ઝીરો ૨૧ ડિસેમ્બરના રોજ રીલીઝ થવાની છે. ફિલ્મમાં શાહરુખ ઉપરાંત અનુષ્કા શર્મા અને કેટરીના કૈફ નજરે પડશે.