હું હાલના વડા પ્રધાન નરેન્દ્ર મોદીની બાયો-ફિલ્મમાં કામ કરીશ: પરેશ રાવલ
મુંબઇ : અભિનેતા સાંસદ પરેશ રાવલે કહ્યું હતું કે હા, હું હાલના વડા પ્રધાન નરેન્દ્ર મોદીની બાયો-ફિલ્મમાં નરેન્દ્ર મોદીનો રોલ કરવાનો છું. દોઢેક દાયકા અગાઉ પરેશે સરદાર વલ્લભભાઇ પટેલનો રોલ કર્યો હતો અને એ દુનિયાભરના ફિલ્મ રસિકોએ બિરદાવ્યો હતો. પરેશે કહ્યું કે મારા જીવનનો આ સૌથી મોટો પડકાર હશે કે નરેન્દ્ર મોદીનો રોલ કરવો. અગાઉ આટલો મોટો ચેલેંજિંગ રોલ મારી સમક્ષ કદી આવ્યો નથી. હાલ પરેશ રાવલે અન્ય સિનિયર અભિનેતા સંજય દત્તની બાયો -ફિલ્મમાં સુનીલ દત્તનો રોલ કર્યેા છે. નરેન્દ્ર મોદીની બાયોફિલ્મની જાહેરાત ગયા વરસે થઇ હતી. હાલ એ વિશે પૂછતાં પરેશે કહ્યું કે હજુ અમે સ્ક્રીપ્ટ તૈયાર કરી રહ્યા છીએ. એકવાર સ્ક્રીપ્ટ તૈયાર થઇ જાય અને નરેન્દ્રભાઇ એને બહાલી આપે ત્યારબાદ આ બાયો-ફિલ્મની વાત આગળ વધી શકે.પરંતુ હું ફરીવાર કહું છું કે કોઇ પણ અભિનેતા માટે આ રોલ સૌથી વધુ પડકાર રૃપ બની શકે એવો છે. આગામી થોડાક મહિનામાં આ ફિલ્મ ફ્લોર પર લઇ જવાની પરેશની યોજના છે. એણે કહ્યું કે લગભગ સપ્ટેંબર ઓક્ટોબરની આસપાસ આ ફિલ્મ ફ્લોર પર જશે એવી મારી ધારણા છે. એ પહેલાં સ્ક્રીપ્ટ એકદમ તૈયાર થઇ જવી જોઇએ.