માસ્ટર શેફમાં જોવા મળશે અક્ષયકુમાર?

મુંબઇ તા. ૩: સ્ટાર પ્લસ પર આવતી સિરિયલ 'માસ્ટર શેફ'માં બહુ જલદી અક્ષયકુમાર જોવા મળશે એવી ચર્ચા છે. બ્રિટિશ સીઝન 'માસ્ટર શેફ' પરથી ઇન્ડિયામાં ર૦૧૦માં આ શો શરૂ કરવામાં આવ્યો હતો. આ પહેલી સીઝનને અક્ષયકુમાર દ્વારા હોસ્ટ અને જજ કરવામાં આવી હતી. ત્યારબાદ આ શોની તમામ સીઝનને શેફ વિકાસ ખન્નાએ અન્ય શેફ સાથે મળીને જજ કરી હતી. આ શોની છઠ્ઠી સીઝનમાં પણ વિકાસ ખન્ના અન્ય શેફ રણવીર બ્રાર અને વિનીત ભાટિયા સાથે મળીને જજ કરશે. આ સીઝનના પહેલા શોમાં સેલિબ્રિટી ગેસ્ટ તરીકે અક્ષયકુમાર જોવા મળશે એવી ચર્ચા છે. સાત ડિસેમ્બરથી શરૂ થઇ રહેલા આ શો માટે અક્ષયકુમારે હજી સુધી તેની તારીખો નથી ફાળવી. તે હાલમાં તેની 'ગુડ ન્યુઝ'ને પ્રમોટ કરી રહ્યો છે અને આ શોમાં પણ તે ફિલ્મને પ્રમોટ કરે તો નવાઇ નહીં. જોકે ૯૯.૯૯ ટકા આ શોમાં તે જોવા મળશે એવી શકયતા છે.