Gujarati News

2 નવેમ્બરે બોલિવુડના ‘બાદશાહ’ શાહરૂખ ખાન અને તેના ફેન્સ માટે ડબલ સેલિબ્રેશનનો દિવસ હશે. 2 નવેમ્બરે શાહરૂખ પોતાનો 53મો જન્મદિવસ મનાવશે સાથે જ તેની આગામી ફિલ્મ ‘ઝીરો’નું ટ્રેલર રિલીઝ થશે. આ વખતે શાહરૂખના બર્થ ડે પર તેના ઘર ‘મન્નત’ ખાતે ખાસ તૈયારીઓ કરવામાં આવી રહી છે.

શાહરૂખની બર્થ ડેના બે દિવસ બાકી છે ત્યારે મન્નતને રોશનીથી સજાવાયું છે. શાહરૂખના બંગલાની તસવીરો સોશિયલ મીડિયા પર વાયરલ થઈ રહી છે. શાહરૂખ આનંદ એલ રાયની ફિલ્મ ‘ઝીરો’માં ઠીંગણાના પાત્રમાં જોવા મળશે. આ ફિલ્મ આ વર્ષના અંતે રિલીઝ થવાની છે.

‘ઝીરો’માં ઠીંગણાના રોલમાં જોવા મળશે

શાહરૂખે અંતે રૂપેરી પડદા પરથી પોતાની ચોકલેટ બોયની ઈમજને ગુડ બાય કહ્યું છે અને અલગ પ્રકારના રોલ ભજવવા માટે તૈયાર થયો છે. ‘ઝીરો’ એવી જ ફિલ્મ છે જેમાં શાહરૂખનો રોલ કંઈક હટકે હશે. આ ફિલ્મની જાહેરાત થઈ ત્યારથી જ કિંગ ખાનના ફેન્સ તેનો નવો અવતાર જોવા માટે ઉત્સુક છે.

21 ડિસેમ્બરે રિલીઝ થશે ‘ઝીરો’

કેટરીના કૈફના 35મા જન્મદિવસ અને ઈદ પર ‘ઝીરો’નું એક ગીત રિલીઝ કરવામાં આવ્યું, જેમાં સલમાન પણ જોવા મળે છે. હવે ફિલ્મના મેકર્સે શાહરૂખના 53મા જન્મદિવસે ફિલ્મનું ટ્રેલર રિલીઝ કરવાની તૈયારીઓ કરી લીધી છે. આ ફિલ્મમાં શાહરૂખની સાથે અનુષ્કા શર્મા અને કેટરીના કૈફ પણ જોવા મળશે. ‘ઝીરો’ 21 ડિસેમ્બરે રિલીઝ થશે.