Gujarati News

દીપિકા પાદુકોણ અને રણવીર સિંહ લગ્નના બંધનમાં બંધાઈ ચૂક્યા છે. ઈટલીમાં લગ્ન કર્યા બાદ જોડીએ પહેલુ રિસેપ્શન દીપિકાના પિયર એટલે કે બેંગલુરુમાં આપ્યું હતું. હવે મુંબઈમાં તે ગ્રાન્ડ રિસેપ્શન આપવાના છે. આ દરમિયાન દીપિકા હાલમાં જ મુંબઈ અને બેંગલુરુ એરપોર્ટ પર મીડિયાના કેમેરામાં કેદ થઈ ગયા હતા. પરંતુ આ ફોટોઝમાં નવપરિણિત દંપત્તિની ખુશી સાથે બીજુ પણ કંઈક કેદ થઈ ગયુ હતુ અને તે છે દીપિકા પાદુકોણનું RK ટેટૂ.

રણવીર સાથે રિલેશનશીપમાં આવતા પહેલા દીપિકા લાંબો સમય રણબીર કપૂર સાથે રિલેશનશીપમાં રહી હતી. આ દરમિયાન દીપિકાએ પોતાની ગરદન પર રણબીર કપૂરના ઈનિશિયલ્સ એટલે કે RKનું ટેટૂ બનાવ્યું હતું. રણબીર અને દીપિકાના સંબંધ તૂટી ગયા પછી દીપિકા લાંબો સમય ડિપ્રેશનમાં પણ રહી હતી પરંતુ રણવીર સાથે નવો સંબંધ શરૂ થયા બાદ દીપિકાએ આ ટેટૂ હટાવ્યું નહતુ.

દીપિકા અને રણવીર છેલ્લા છ વર્ષથી રિલેશનશીપમાં છે એ વાતની પુષ્ટિ દીપિકાએ હાલમાં જ કૉફી વિથ કરણ ચેટ શોમાં કરી હતી. ઈટલીમાં લગ્ન બાદ દીપિકા પહેલી વાર મુંબઈ એરપોર્ટ પર દેખાઈ ત્યારે તેણે વ્હાઈટ સુટ પર લાલ રંગનો બનારસી દુપટ્ટો ઓઢ્યો હતો. આથી આ દુપટ્ટાને કારણે દીપિકાનું ટેટુ નહતુ દેખાયુ.

મંગળવારે ફરી તે મુંબઈ એરપોર્ટ પર દેખાઈ હતી. ત્યારે તે બેંગલુરુ જવા રવાના થઈ રહી હતી. આ દરમિયાન દીપિકા સુંદર વ્હાઈટ અનારકલીમાં દેખાતી હતી. આ ડ્રેસમાં દીપિકાની ગરદન પરથી ટેટૂ ગાયબ થઈ ગયુ હતુ. આ સાથે જ એવી અટકળ થવા માંડી હતી કે દીપિકાએ લગ્ન બાદ રણબીરનું ટેટૂ હટાવી દીધુ છે. પરંતુ હવે એવુ લાગે છે કે દીપિકા આવુ કરવાના મૂડમાં નથી.

બુધવારે બેંગલુરુમાં રિસેપ્શન બાદ ગુરુવારે દીપિકા પોતાના સાસુ-સસરા, નણંદ રિતિકા અને પતિ રણવીર સાથે બેંગલુરુથી મુંબઈ જવા રવાના થઈ હતી. આ દરમિયાન પણ દીપિકા અનારકલીમાં જોવા મળી હતી પરંતુ આ વખતે તેનુ ટેટૂ દેખાઈ ગયુ હતુ. આનો અર્થ એ કે દીપિકા ભલે રણવીર સાથે જીવનમાં આગળ વધી ગઈ છે પરંતુ તે આર કેના ટેટૂને પોતાનાથી અલગ નથી કરવાની.

અગાઉ પણ દીપિકા ટેટૂ ગાયબ કરી ચૂકી છે. કાન્સ ફિલ્મ ફેસ્ટિવલ દરમિયાન દીપિકા રેડ ડ્રેસમાં કાર્પેટ પર ચાલી હતી ત્યારે આ ટેટૂ તેની ગરદનથી ગાયબ હતુ. ઉલ્લેખનીય છે કે દીપિકા અને રણવીરનું નેક્સ્ટ રિસેપ્શન 28 નવેમ્બરે મુંબઈમાં છે.