Gujarati News

ઈટલીમાં ધામધૂમથી લગ્ન, બેંગલુરુમાં ગ્રાન્ડ રિસેપ્શન… એવુ લાગે છે કે લગ્ન માટે સારો એવો બ્રેક લીધા પછી રણવીર-દીપિકા કામ પર પાછા ફરવા તલપાપડ છે. દીપિકા ટૂંક જ સમયમાં મેઘના ગુલઝારની એસિડ એટેક સર્વાઈવર લક્ષ્મીના જીવન આધારિત ફિલ્મનું શૂટિંગ કરશે તો રણવીર સિંહે તો ગઈકાલથી જ કામ શરૂ કરી દીધુ છે.

રણવીર સિંહ ગઈકાલે યશરાજ સ્ટુડિયો બહાર દેખાયો હતો. અહીં તેણે આગામી ફિલ્મ સિમ્બા માટે શૂટ કર્યું હતું. રણવીર અને રોહિત શેટ્ટી સતત તેમના ચાહકોને સિમ્બા વિષે અપડેટ આપતા રહે છે અને ફિલ્મ મેકિંગના ફોટોઝ અને વીડિયોઝ અપલોડ કરતા રહે છે.

સિમ્બા 28 ડિસેમ્બરે રીલીઝ થઈ રહી છે. આ પહેલા શાહરૂખની ફિલ્મ ઝીરો રીલીઝ થઈ રહી છે. આથી બોલિવુડના ચાહકો આતુરતાથી ડિસેમ્બર મહિનાની રાહ જોઈ રહ્યા છે.

જણાવી દઈએ કે સિમ્બા જુનિયર એનટીઆરની તેલુગુ ફિલ્મ ટેમ્પરની રિમેક છે. આ ફિલ્મમાં ઘણો મસાલો, એન્ટરટેઈનમેન્ટ, ગીતો અને લાર્જર ધેન લાઈફ એક્શન સિક્વન્સ હશે. રોહિત શેટ્ટીની ફિલ્મ હોવાથી તમને ઘણી બધી કાર હવામાં ઉડતી જોવા મળશે. રણવીર આ ફિલ્મમાં ભ્રષ્ટાચારી પોલીસ ઑફિસરના રોલમાં છે.