Gujarati News

મુંબઇ,તા.૨૪: દેશમાં જ નહીં પરંતુ દુનિયાભરમાં જાણીતા શો ધ કપિલ શર્મા શો ફરી એકવખત વિવાદમાં સપડાયો છે. જી હાં આ શો સામે ગંભીર આરોપ લગાવી અરજી કરવામાં આવી છે. શિવપુરીની જિલ્લા અદાલતમાં સોની ટીવી પર ચાલતા ધ કપિલ શર્મા શોના એક એપિસોડ સામે FIR દાખલ કરવાની માંગ કરવામાં આવી છે. અરજીમાં આરોપ લગાવવામાં આવ્‍યો છે કે એક એપિસોડમાં શોના કેટલાક કલાકારો સ્‍ટેજ પર ખુલ્લામાં દારૂ પીતા જોવા મળે છે. જયારે બોટલમાં લખેલું છે કે દારૂ પીવો સ્‍વાસ્‍થ્‍ય માટે હાનિકારક છે. ફરિયાદીના વકીલ શિવપુરીએ CJM કોર્ટમાં FIR દાખલ કરી છે. કેસની આગામી સુનાવણી ૧ ઓક્‍ટોબરના રોજ કરવામાં આવશે.
વકીલનું કહેવું છે કે, સોની ટીવી પર પ્રસારિત થતો કપિલ શર્મા શો ખૂબ જ અસ્‍થિર છે. આ શોમાં અભદ્ર ટિપ્‍પણીઓ પણ કરવામાં આવે છે. એક શોમાં સ્‍ટેજ પર કોર્ટની સ્‍થાપના કરવામાં આવી હતી અને કલાકારોએ સ્‍ટેજ પર જાહેરમાં દારૂ પીધો હતો. આ કાયદો કોર્ટનો તિરસ્‍કાર છે. એટલા માટે મેં અદાલતમાં કલમ ૩૫૬/૩ હેઠળ ગુનેગારો સામે એફઆઈઆર નોંધવાની માંગણી કરી છે જેથી આવા પ્રદર્શનને રોકી શકાય.
૧૯ જાન્‍યુઆરી ૨૦૨૦ના રોજ અરજીનો ઉલ્લેખ કરવામાં આવ્‍યો છે. જેનું રિપીટ ટેલિકાસ્‍ટ ૨૪ એપ્રિલ ૨૦૨૧ના   રોજ પણ કરવામાં આવ્‍યું હતું. વકીલનો દાવો છે કે શોમાં એવું દર્શાવવામાં આવ્‍યું છે કે કોર્ટના સેટ બનાવીને એક પાત્રને દારૂના પ્રભાવ હેઠળ કામ કરતો બતાવવામાં આવ્‍યો છે. તેનાથી કોર્ટની બદનામી થઈ છે.