Gujarati News

મુંબઇ તા. ૨૩ : ગ્લેમર ઈન્ડસ્ટ્રીમાં જાતિય શોષણના કિસ્સાનો ઈતિહાસ બહુ જૂનો છે. ઘણી એકટ્રેસિસ પોતાની સાથે બનેલી આવી ઘટનાઓ વિશે વાત કરી ચૂકી છે. તાજેતરમાં #Metoo કેમ્પેઈન બાદ ઘણી એકટ્રેસિસે આ મુદ્દે પોતાના અનુભવો શેર કર્યા હતા. હવે આ જ યાદીમાં વધુ એક નામ જોડાઈ ગયું છે અને તે 'સાહેબ, બીબી ઔર ગેંગસ્ટર' ફેમ માહિ ગિલ.

પોતાની આગામી ફિલ્મ 'સાહેબ, બીબી ઔર ગેંગસ્ટર-૩'ની એક પ્રમોશનલ ઈવેન્ટમાં એક ઈન્ટરવ્યુ દરમિયાન માહિએ ખુલાસો કરતા કહ્યું કે, એકવાર એક ડિરેકટરે તેને ટ્રાન્સપરન્ટ નાઈટી પહેરી તેની સામે આવવા માટે કહ્યું હતું. જોકે, માહિએ આ ઓફર સ્વીકારી નહોતી અને ત્યાંથી ભાગી આવી હતી.

જયારે માહિને બોલિવૂડમાં થતા યૌન શોષણ વિશે પૂછવામાં આવ્યું ત્યારે તેણે કહ્યું કે, 'આવું માત્ર બોલિવૂડમાં જ નહીં, બીજે બધે પણ થાય છે. માત્ર મહિલાઓ જ નહીં પુરુષો પણ તેનો શિકાર બને છે. જોકે, મને લાગે છે આ બાબતે આપણી ઈન્ડસ્ટ્રી ઘણી સેફ છે. તમારામાં ના પાડવાની હિંમત હોય તો તમને કોઈ ટચ કરી શકતું નથી.'

માહિએ આગળ જણાવ્યું કે, 'ઘણીવાર નાના શહેરોમાંથી આવતી છોકરીઓ કામ ન મળવાની બીકથી પોતાની જાતને સમર્પિત કરી દેતી હોય છે. આવી બાબતોમાં ના પાડતા શીખવું જોઈએ.'

તિગ્માંશુ ધૂલિયા નિર્દેશિત 'સાહેબ, બીબી ઔર ગેંગસ્ટર-૩' ૨૭ જુલાઈએ રિલીઝ થઈ રહી છે. ફિલ્મમાં માહિ ગીલ ઉપરાંત જિમ્મી શેરગિલ અને સંજય દત્ત્। મુખ્ય ભૂમિકામાં છે. સીરીઝની અગાઉની બંને ફિલ્મો સુપરહિટ રહી હતી. આ ફિલ્મમાં સંજય એક ગેંગસ્ટરની ભૂમિકામાં દેખાશે.(૨૧.૯)