Gujarati News

મુંબઈ : ખુરાના પરિવારમાં હાલ ખુશીનો માહોલ છે કારણે અપારશક્તિ ખુરાના અને તેની પત્ની આક્રિતિ આહુજા ટૂંક જ સમયમાં મમ્મી-પપ્પા બનવાના છે. સૂત્રોએ જણાવ્યું છે કે, બોલિવુડના ટેલેન્ટેડ એક્ટરમાંથી એક અપારશક્તિની પત્ની આક્રિતિ પ્રેગ્નેન્ટ છે અને તેઓ તેમના પહેલા સંતાનને આવકારવા માટે આતુર છે. કપલે હજુ સુધી આ અંગે કોઈ જાહેરાત કરી નથી. અપારશક્તિ અને આક્રિતિએ ૭મી સપ્ટેમ્બર, ૨૦૧૪ના રોજ લગ્ન કર્યા હતા. ગયા વર્ષે લોકડાઉન દરમિયાન, ખુરાનાએ ચંડીગઢના પંચકુલામાં મોટુ ઘર ખરીદ્યું હતું. આયુષ્માન, તાહિરા, અપારશક્તિ અને આક્રિતિએ તેમના માતા-પિતા તેમજ પરિવાર સાથે ઘણા મહિના પસાર કર્યા હતા. તે સમયે અમારા સહયોગી મુંબઈ મિરર સાથે વાતચીત કરતાં અપારશક્તિએ કહ્યું હતું કે, તે ઈચ્છે છે કે તેના બાળકો ચંડીગઢમાં ઉછરે. અપારશક્તિ ખુરાનાએ અત્યારસુધીમાં સાઈડ રોલ કર્યા છે. પરંતુ જે રોલ કર્યા તેમા તેણે પોતાની અભિનય ક્ષમતાથી દર્શકોના દિલ જીતી લીધા. સાઈડ રોલ કરનારા એક્ટર્સ ઘણીવાર બોલિવુડમાં પોતાનું નામ બનાવી શકતા નથી. પરંતુ, અપારશક્તિનો કિસ્સો અલગ છે. ભાઈ આયુષ્માનનું બી-ટાઉનમાં મોટુ નામ હોવા છતાં તે પોતાના બળ પર આગળ વધી રહ્યો છે. અપારશક્તિ ખુરાનાએ ફિલ્મ 'દગંલ'થી બોલિવુડમાં ડેબ્યૂ કર્યું હતું. જેમા તેણે આમિર ખાન સાથે કામ કર્યું હતું. આ સિવાય તે લૂકા છુપી, સ્ત્રી, પતિ, પત્ની ઔર વો, જબરિયાં જોડી જેવી ફિલ્મોમાં કામ કરી ચૂક્યો છે. વર્ક ફ્રંટની વાત કરીએ તો, અપારશક્તિ ખુરાના ટૂંક સમયમાં ફિલ્મ હેલ્મેટમાં જોવા મળશે. આ એવી પહેલી ફિલ્મ હશે જેમા તે લીડ રોલમાં છે. આ ફિલ્મ વિશે એક ન્યૂઝ એજન્સી સાથે વાત કરતાં અપારશક્તિએ કહ્યું હતું કે, 'હેલ્મેટ એક એવો શબ્દ છે જે કોન્ડોમને આપવામાં આવે છે. હકીકતમાં, ફિલ્મ કોન્ડોમ વિશે જ છે'. આ ફિલ્મ સતરામ રામાણીના ડિરેક્શનમાં બની રહી છે. જેમાં પ્રણુતન બહેન, અભિષેક બેનર્જી અને આશિષ વર્મા લીડ રોલમાં છે.