Gujarati News

મુંબઈ : તારક મહેતા કા ઉલ્ટા ચશ્મા સીરિયલમાં બબીતાનો રોલ કરતી એક્ટ્રેસ મુનમુન દત્તા ઓન સ્ક્રીન જેટલી સ્ટાઈલિશ છે તેટલી જ રિયલ લાઈફમાં પણ છે. મુનમુનને પોતાના લૂક સાથે પ્રયોગો કરવાનું ગમે છે. ત્યારે એક્ટ્રેસે ફરી એકવાર પોતાનો લૂક બદલીને ફેન્સને સરપ્રાઈઝ આપી છે. મુનમુન દત્તાએ વાળ કપાવીને ટૂંકા કરી દીધા છે. અગાઉ લાંબા કાળા વાળ ધરાવતી મુનમુને હવે વાળ કપાવી નાખ્યા છે. નવા લૂકમાં મુનમુન એકદમ ફ્રેશ અને યંગ લાગી રહી છે. મુનમુને પોતાના નવા લૂકની ઝલક ઈન્સ્ટાગ્રામ પર શેર કરતાં લખ્યું, ટૂંકા વાળ વર્ષો પછી. સોશિયલ મીડિયા પર એક્ટિવ રહેતી મુનમુને ઈન્સ્ટાગ્રામ સ્ટોરીમાં પણ નવા હેરકટની ઝલક બતાવતા નાના-નાના બૂમરેંગ વિડીયો શેર કર્યા છે. વિડીયો શેર કરતાં તેણે લખ્યું કે, તેને આ નવો લૂક ખૂબ પસંદ આવી રહ્યો છે. મુનમુન દત્તા ઈન્ડિયન ટેલિવિઝનની સ્ટાઈલિશ એક્ટ્રેસ પૈકીની એક છે અને તેનું સોશિયલ મીડિયા અકાઉન્ટ આ વાતની સાક્ષી પૂરે છે. થોડા દિવસ પહેલા જ શૂટિંગ શિડ્યુલમાંથી બ્રેક લઈને મુનમુન પોતાની મમ્મીને મળવા વતન દુર્ગાપુર પહોંચી હતી. વિવિધ તસવીરો શેર કરીને મુનમુને જણાવ્યું હતું કે, મહામારીના કારણે એક વર્ષથી વધુ સમય બાદ તે દુર્ગાપુર પહોંચી છે. ટ્રાવેલિંગનો શોખ ધરાવતી મુનમુન એક વર્ષ પછી ફ્લાઈટમાં બેઠી હતી. કોરોનાના કારણે મુનમુન ગયું આખું વર્ષ ક્યાંય ફરવા નહોતી જઈ શકી. મુનમુનને ટ્રાવેલિંગનો ખૂબ શોખ છે અને દર વર્ષે તે જુદા-જુદા દેશોમાં ફરવા જતી હોય છે. પરંતુ ૨૦૨૦માં કોરોનાના કારણે બ્રેક લાગી ગયો હતો. જણાવી દઈએ કે, મુનમુન દત્તા શરૂઆતથી જ સીરિયલ 'તારક મહેતા કા ઉલ્ટા ચશ્મા'નો ભાગ છે. સીરિયલમાં બંગાળી મહિલાનો રોલ કરતી મુનમુન અસલ જિંદગીમાં પણ બંગાળી જ છે. દર્શકોને જેઠાલાલ અને બબીતાજીના સીન ખૂબ પસંદ આવે છે. કોમેડી સીરિયલ 'તારક મહેતા...' છેલ્લા ૧૩ વર્ષથી દર્શકોને હસાવી રહી છે. શોના દરેક પાત્રો ખૂબ પોપ્યુલર છે. રિયલ લાઈફમાં પણ જે-તે પાત્ર ભજવતા કલાકારોને લોકો તેમના ઓન-સ્ક્રીન નામથી જ ઓળખે છે. મહત્વનું છે કે, ૨૦૦૮માં શરૂ થયેલી સીરિયલ 'તારક મહેતા કા ઉલ્ટા ચશ્મા' ભારતીય ટેલિવિઝનના સૌથી લાંબા ચાલનારા શો પૈકીની એક છે.