Gujarati News

મુંબઈ: અભિનેતા રણબીર કપૂરે કહ્ય હતું કે મારી આગામી ફિલ્મ બ્રહ્માસ્ત્ર બાહુબલિ ટાઇપની ફિલ્મ નથી. આ એક અલગ પ્રકારની ફિલ્મ છે જેમાં કથાનાયક સુપર નેચરલ પાવર્સ ધરાવતો હોવાથી જરૃરતમંદ લોકોને મદદ કરે છે. હોલિવૂડની સુપરમેન અને સ્પાઇડર મેન જેવી સુપરહીરોને રજૂ કરતી આ ફિલ્મ ટોચના ફિલ્મ સર્જક કરણ જોહર બનાવી રહ્યા છે. એમની યોજના આ ટાઇપની ત્રણ ફિલ્મો (ટ્રિલોજી ) બનાવવાની છે. બ્રહ્માસ્ત્ર એમાંની પહેલી કડી છે જેમાં રણબીર કપૂર સાથે આલિયા ભટ્ટ અને મેગાસ્ટાર અમિતાભ બચ્ચન ચમકી રહ્યાં છે. રણબીરે કહ્યું કે બાહુબલિ અલગ ટાઇપની ફિલ્મ હતી. બ્રહ્માસ્ત્ર એ ટાઇપની ફિલ્મ નથી. આ ફિલ્મના ડાયરેક્ટર અયાન મુખરજી મારા ખાસ દોસ્ત છે અને એની સાથે કામ કરવામાં મને ખૂબ મજા આવતી રહી છે. આ ફિલ્મની સ્ક્રીપ્ટ લખવામાં એને પાંચ વર્ષ લાગ્યાં હતાં. એણે આ ફિલ્મની સ્ક્રીપ્ટ પાછળ ખૂબ મહેનત લીધી છે અને અત્યારે ફિલ્મ બનાવવામાં પણ એ સખત મહેનત લઇ રહ્યો છે.  આ ફિલ્મ આવતા વર્ષના સ્વાતંત્ર્ય દિને રજૂ કરવાની કરણ જોહરની યોજના છે.