Gujarati News

મુંબઇ, તા.૧૯: રોહિત શેટ્ટી અને રણવીર સિંહ ફરી એકવાર દર્શકોનું મનોરંજન કરવા આવી રહ્યા છે. 'સિમ્બા' અને 'સૂર્યવંશી' બાદ રણવીર સિંહ ત્રીજી વખત રોહિત શેટ્ટી સાથે ફિલ્મ કરવા જઈ રહ્યો છે. રોહિત શેટ્ટીના આગામી કોમેડી-ડ્રામામાં રણવીર સિંહ લીડ રોલમાં જોવા મળશે. રોહિતની આ ફિલ્મ વિલિયમ શેકસપીયરના કલાસિક નાટક 'ધ કોમેડી ઓફ એરર્સ' આધારિત હશે. ફિલ્મનું નામ 'સર્કસ' રાખવામાં આવ્યું છે.

આ ફિલ્મની સ્ટારકાસ્ટના નામ પણ સામે આવી ગયા છે. મુંબઈ મિરરના રિપોર્ટ પ્રમાણે, રણવીર સિંહ ઉપરાંત ફિલ્મમાં પૂજા હેગડે, જેકલીન ફનર્િાન્ડઝ, વરુણ શર્મા, સિદ્ઘાર્થ જાધવ, જોની લીવર, સંજય મિશ્રા, વ્રજેશ હીરજી, વિજય પાટકર, સુલભા આર્યા, મુકેશ તિવારી, અનિલ ચરણજીત, અશ્વિની કાલેસ્કર અને મુરલી શર્મા અભિનય કરશે. ' સિમ્બા' બાદ રણવીર સિંહ સુલભા આર્યા સાથે બીજી વખત 'સર્કસ'માં જોવા મળશે. રણવીર સિંહ જેવો એનર્જેટિક એકટર અને દમદાર સ્ટારકાસ્ટ છે ત્યારે રોહિતની આ ફિલ્મના સેટ પર ખૂબ ધમાલ થશે તેવું લાગી રહ્યું છે.

રોહિત શેટ્ટી અને રણવીર સિંહની 'સર્કસ'નું શૂટિંગ આવતા મહિનાથી શરૂ થશે. મુંબઈ, ઉટી અને ગોવામાં ફિલ્મનું શૂટિંગ કરવામાં આવશે. ૨૦૨૧માં ફિલ્મ રિલીઝ થશે તેવા અહેવાલ છે. મીડિયા રિપોર્ટ મુજબ, આ ફિલ્મમાં રણવીર સિંહ ડબલ રોલમાં જોવા મળશે. ફિલ્મની વાર્તા ટ્વિન્સની હશે જે જન્મ સમયે જ અલગ પડી જાય છે અને વર્ષો બાદ એકબીજા સાથે ભેટો થાય છે. જણાવી દઈએ કે, રણવીર સિંહ પહેલીવાર ડબલ રોલ કરશે. રોહિત શેટ્ટીની ફિલ્મો અને તેમની કોમેડી સ્ટાઈલથી વાકેફ દર્શકોમાં 'સર્કસ'માટે અત્યારથી ઉત્સાહ દેખાઈ રહ્યો છે.

આ તરફ રોહિત શેટ્ટીની ફિલ્મ 'સૂર્યવંશી' માટે પણ આતુરતા ઓસરી નથી. અક્ષય કુમાર અને કેટરિના કૈફ આ ફિલ્મમાં લીડ રોલમાં છે. આમ તો, 'સૂર્યવંશી' ૨૦૨૦માં રિલીઝ થવાની હતી પણ કોરોના મહામારીના કારણે હવે ૨૦૨૧માં રિલીઝ થશે તેવી ચર્ચા છે. કોરોનાના કારણે લોકડાઉન જાહેર થયું તે પહેલા જ ફિલ્મનું ટ્રેલર રિલીઝ કરવામાં આવ્યું હતું. રોહિત શેટ્ટીના કોપ યુનિવર્સની આ ચોથી ફિલ્મ છે. અજય દેવગણ સાથે 'સિંઘમ' અને 'સિંઘમ રિટર્ન્સ' બાદ 'સિમ્બા'માં રણવીર સિંહ પોલીસના રોલમાં જોવા મળ્યો હતો. ત્યારે હવે અક્ષય કુમાર 'સૂર્યવંશી'માં DCP વીર સૂર્યવંશીના રોલમાં જોવા મળશે.