Gujarati News

મુંબઈ, તા.૧૫ : ડિસેમ્બર મહિનામાં બોલિવુડ એક્ટર વિકી કૌશલ અને કેટરિના કૈફના લગ્ન થવાના હોવાની ચર્ચા જોરશોરથી ચાલી રહી છે. અત્યાર સુધી સામે આવેલી વિગતો પ્રમાણે, ૭-૯ ડિસેમ્બર દમિયાન રાજસ્થાનના સવાઈ માધોપુરના સિક્સ સેન્સિસ ફોર્ટમાં વિકી અને કેટરિનાના લગ્ન થવાના છે. તેમના લગ્નના આઉટફિટથી માંડીને ગેસ્ટ લિસ્ટ સુધીની બધી જ તૈયારી થઈ ગઈ છે. જોકે, હવે એવા અહેવાલો આવી રહ્યા છે કેટરિનાના અંગત મિત્રો પૈકીનો એક સલમાન ખાન લગ્નમાં હાજર નહીં રહે.

અહેવાલો હતા કે દિવાળીના દિવસે વિકી કૌશલ અને કેટરિના કૈફે ડાયરેક્ટર કબીર ખાનના ઘરે સગાઈ કરી હતી. મિનિ માથુર અને કબીર ખાને રોકા સેરેમની હોસ્ટ કરી હતી ત્યારે નિઃશંકપણે તેઓ કેટરિનાના લગ્નમાં હાજરી આપશે. ત્યારે કહેવાઈ રહ્યું હતું કે, આ બંનેની હાજરીના લીધે સલમાન કેટરિના અને વિકીના લગ્નમાં નહીં આવે. ઉલ્લેખનીય છે કે, 'ટ્યૂબલાઈટ' ફિલ્મ બાદ સલમાન અને કબીર ખાનના સંબંધોમાં ખટાશ આવી હતી. જોકે, હવે માહિતી પ્રાપ્ત થઈ છે કે, કબીર ખાન સાથેના બગડેલા સંબંધો નહીં કામ કેટરિના-વિકીના લગ્નમાં સલમાનની ગેરહાજરીનું કારણ બની શકે છે.

મીડિયામાં વહેતા થયેલા અહેવાલોનું માનીએ તો, સલમાન ખાનને 'ટાઈગર ૩' અને 'પઠાણ'ના મહત્વના ભાગનું શૂટિંગ કરવાનું હતું. પરંતુ શાહરૂખ ખાનના અંગત જીવનમાં છેલ્લા એક મહિનામાં બનેલી ઘટનાને કારણે શૂટિંગ થઈ શક્યું નહોતું. હવે શાહરૂખનું અંગત જીવન પાટે ચડી રહ્યું છે અને તે ફરી શૂટિંગ શરૂ કરવાનો છે. ત્યારે ડિસેમ્બરમાં શાહરૂખ શૂટિંગ માટે વિદેશ જાય તે પહેલા સલમાન તેની સાથેના હિસ્સાનું શૂટિંગ પૂરું કરી દેવા માગે છે. શૂટિંગની તારીખો કેટરિનાના લગ્ન સાથે ક્લેશ થઈ રહી છે અને આ જ કારણે સલમાન હાજર નહીં રહી શકે.*

મીડિયા રિપોર્ટમાં એવો પણ દાવો કરવામાં આવ્યો છે કે, સલમાન ખાન કામના લીધે લગ્નમાં હાજર નહીં રહી શકે પણ તેનો પરિવાર ચોક્કસથી સામેલ થશે. સૂત્રોએ જણાવ્યા પ્રમાણે, સલમાન ખાનની નાની બહેન અર્પિતા અને કેટરિના ખાસ બહેનપણીઓ છે. એટલે તે ચોક્કસથી લગ્નમાં હાજર રહેશે. અર્પિતા ઉપરાંત સલમાનની મોટી બહેન અલ્વીરા અગ્નહોત્રી અને તેની મમ્મી સલમા ખાન પણ કેટરિનાના લગ્નમાં સામેલ થશે.

સલમાનના પરિવાર ઉપરાંત વરુણ ધવન-નતાશા દલાલ, સિદ્ધાર્થ મલ્હોત્રા-કિયારા અડવાણી, કરણ જોહર વગેરે જેવા સેલિબ્રિટીઝ લગ્નમાં હાજરી આપશે તેવી ચર્ચા છે. કેટરિના અને વિકીના લગ્નની ચર્ચાઓથી મનોરંજનની ગલીઓ ગરમ છે પણ કપલે હજી સુધી કોઈ ઓફિશિયલ જાહેરાત કરી નથી. જોકે, ટૂંક સમયમાં તેઓ જાહેરાત કરશે તેવી અટકળો છે.

સલમાનના વર્કફ્રંટની વાત કરીએ તો તેની પાસે 'ટાઈગર ૩', 'કિક ૨', 'કભી ઈદ કભી દિવાળી' જેવી ફિલ્મો છે. આ સિવાય તે શાહરૂખ ખાનની ફિલ્મ 'પઠાણ'માં કેમિયો રોલ કરવાનો છે.