Gujarati News

મુંબઇ: સિનિયર અભિનેતા સંજય દત્તને મુખ્ય ભૂમિકામાં ચમકાવતી હિટ મુન્નાભાઇ સિરિઝની ત્રીજી કડી આવતા વર્ષની આખર સુધીમાં ફ્લોર પર જશે એમ આ સિરિઝમાં સર્કિટનો રોલ કરનારા કોમેડિયન અર્શદ વારસીએ કહ્યું હતું.પહેલી કડી મુન્નાભાઇ એમ બી બી એસમાં સંજય દત્ત સાથે એના અભિનેતા પિતા સુનીલ દત્ત પણ ચમક્યા હતા. આ ફિલ્મમાં મેડિકલ કૉલેજના ડીન તરીકે બોમન ઇરાની ચમક્યા હતા અને આ ફિલ્મ પછી બોમન રાતોરાત સ્ટાર ગણાતો થઇ ગયો હતો.અર્શદ વારસીએ આ ફિલ્મમાં મુન્નાભાઇના જમણા હાથ જેવા સર્કિટનો રોલ કર્યો હતો. એણે કહ્યું કે મને ખુદ ફિલ્મ સર્જક રાજકુમાર હીરાણીએ આ માહિતી આપી હતી કે મુન્નાભાઇ થ્રીની સ્ક્રીપ્ટ લગભગ તૈયાર છે પરંતુ હાલ મારા હાથમાં જે પ્રોજેક્ટ્સ છે એ પૂરા કર્યા બાદ આવતા વર્ષે હું એ ફિલ્મને ફ્લોર પર લઇ જવા વિચારું છું. હાલ અર્શદ વારસી સની દેઓલની ભૈયાજી સુપરહિટ ફિલ્મ રજૂ થવાની વાટ જોઇ રહ્યો છે. આ ફિલ્મ એની કારકિર્દીને જોરદાર પુશ આપે એવી એની અપેક્ષા છે. છેલ્લે એ અજય દેવગણની ગોલમાલ અગેનમાં દેખાયો હતો. આ ફિલ્મ હિટ નીવડી હતી.  જો કે એને અત્યાર સુધીમાં સૌથી વધુ યશ મુન્નાભાઇની સિરિઝથી મળ્યો છે એ હકીકત નકારી શકાય એમ નથી.