Gujarati News

મુંબઇ :  મુન્નાભાઇ એમ.બી.બી.એસ ફિલ્મમાં અભિનય કરનાર વિશાલ ઠક્કર છેલ્લા ત્રણ વર્ષથી ઘરે પરત ફર્યો નથી અને ગૂમ છે. પોલીસને પણ તેનો કોઇ પતો લાગ્યો નથી.

મુન્નાભાઇ એમ.બી.બી.એસમાં વિશાલ ઠક્કરનો ચહેરો જોઇ સૌ કોઇ તેને ઓળખી જશે. એક છોકરી તેને છોડીને જતી રહેતા તે નિરાશ થાય છે અને ઝેર પીને આત્મહત્યાનો પ્રયાસ કરે છે અને ત્યારબાદ તેની માતા તેને સારવાર માટે હોસ્પિટલ સારવાર માટે લઇને આવે છે.

આ આત્મહત્યાનો પ્રયાસ કરનાર યુવાનનો રોલ કરનાર એટલે વિશાલ ઠક્કર. 31 ડિસેમ્બર, 2015નાં રોજ વિશાલ તેની માતાને એવુ કહીને ઘરેથી નિકળ્યો હતો કે, તે પોતે ફિલ્મ જોવા માટે જાય છે. તેણે તેની માતા પાસેથી 500 રૂપિયા પણ લીધા હતા. બસ, આ સમયે છેલ્લી વખત તેની માતાએ તેને જોયો હતો.

ડિસેમ્બર 31ની રાત્રે તેણે તેના પિતાને મેસેજ મોકલ્યો હતો કે, તે તેમા મિત્રો સાથે છે અને તે બીજા દિવસે ઘરે આવશે. બસ, આજની ઘડી અને કાલનો દિવસ. વિશાલ ક્યારેય ઘરે પરત આવ્યો નહીં.

તેનો ફોન પણ બંધ આવે છે અને તેણે આ ફોન ક્યારેય ચાલુ ન કર્યો. વિશાલનાં ગૂમ થયા પછી કોઇએ ખંડણી માટે ફોન પણ નથી કર્યો. તેના બેંક એકાઉન્ટમાં પણ કોઇ હલચલ નથી.

પોલીસ તપાસમાં પણ આજદિન સુંધી કાંઇ ભાળ મળી નથી. તપાસ કર્તા અધિકારીએ કહ્યું કે, શરૂઆતમાં અમને શંકા હતી કે, તેની ગર્લફ્રેન્ડનો રોલ હોઇ શકે પણ તેના નિવેદનોમાં કોઇ વિરોધાભાસ જોવા મળ્યો નથી. પોલીસને હજુ સુંધી એવી ભાળ નથી મળી ક, તેનુ ખૂન થઇ ગયુ છે કે પછી તેનું અપહરણ થયુ છે. અથવા તો તે પોતે જ ઘરેથી ભાગી ગયો છે.