Gujarati News

Gujarati News

News of Tuesday, 12th October 2021

અક્ષય કુમારે 'રક્ષાબંધન'નું શૂટિંગ પુરૂ કર્યુઃ આગામી પ્રોજેકટ માટે તૈયારી

અક્ષયે અતરંગી બાદ આનંદ રાય સાથે આ બીજી વખત પ્રોજેકટમાં કામ કર્યુ

મુંબઈ, તા.૧૨: સુપરસ્ટાર અક્ષય કુમારે ડાયરેકટર આનંદ એલ રાયની ફિલ્મ રક્ષા બંધનનું શૂટિંગ પૂર્ણ કર્યું હોવાની મંગળવારે જાણ કરી હતી. આ એક વિશેષ વાર્તા પર આધારિત છે જેમાં સંબંધોની ઉજવણીને આવરી લેવાઈ છે. આ ફિલ્મની સ્ક્રિપ્ટ હિંમાશું શર્મા અને કનિકા ધિલ્લોને લખી છે. દિલ્હીમાં સોમવારે રાત્રે બોલીવૂડના સુપરસ્ટાર અક્ષય કુમારે આગામી ફિલ્મનું શૂટિંગ પૂર્ણ કર્યું હતું. ત્યારબાદ તેણે સોશિયલ મીડિયા પર એક પોસ્ટ શેર કરી હતી જેમાં તેણે આ પ્રસંગને કડવો-મીઠો અનુભવ ગણાવ્યો હતો.

 અક્ષયે પોસ્ટમાં લખ્યું કે, મે અને આનંદ એલ રાયે રક્ષાબંધન ફિલ્મનું શૂટ પૂર્ણ કર્યું છે. અમે આવતીકાલ નહીં આવે તે રીતે હસ્યા છીએ. ગત રાત્રે આ ફિલ્મની પૂર્ણાહુતી વખતે થોડી ખાટીમીઠી લાગણીઓ અનુભવી જેમાં ક્ષણ માટે ઉદાસ પણ થયો. આ પોસ્ટમાં અક્ષયે તેની સાથે આનંદ રાયની તસવીર પણ શેર કરી હતી.

રક્ષા બંધન ફિલ્મ જૂનમાં ફ્લોર પર ગઈ હતી અને અક્ષય સાથે રાયની આ બીજી ફિલ્મ હતી. અગાઉ બન્નેએ અતરંગી પ્રોજેકટ માટે કામ કર્યું હતું. આ સાથે જ અક્ષય જણાવ્યું કે હવે તે આગામી પ્રોજેકટ માટે કામ ચાલુ કરશે. જો કે અક્કીએ નવી ફિલ્મ વિશે વધુ વિગતો જણાવી નહતી.

અક્ષય કુમાર અને ભૂમિ પેડનેકરને ચમકાવતી આ ફિલ્મ આગામી વર્ષે સ્વતંત્રા પર્વ આસપાસ પર ૧૧ ઓગસ્ટ ૨૦૨૨ના થિયેટર્સમાં રીલિઝ થશે. આ ફિલ્મ આનંદ રાયના પ્રોડકશન હાઉસ યેલો પ્રોડકશન્સ, ઝી સ્ટુડિયો અને અલ્કા હિરાનંદાની તેમજ અક્ષય કુમારના કેપ ઓફ ગુડ ફિલ્મ્સના સહયોગથી પ્રોડ્યુસ કરાઈ છે.

(3:26 pm IST)