Gujarati News

નવી દિલ્હી: ભારતના ભજન સમ્રાટ તરીકે પ્રખ્યાત અનૂપ જલોટાએ પોતાના અવાજથી દેશભરના લોકોના દિલ જીત્યા છે. પરંતુ બિગ બૉસ 12માં ભાગ લેવો એ તેમના ફેન્સ માટે એક મોટી સરપ્રાઈસ હતી. જ્યારે આ સમાચાર સામે આવ્યા કે અનૂપ જલોટા બિગ બૉસના ઘરમાં એન્ટ્રી કરશે તો લોકો આ વાતને અફવા માનતા હતા.

આનાથી મોટી સરપ્રાઈસ તેમણે પ્રીમિયરની રાતે કરી. તેમણે 28 વર્ષીય પંજાબી સિંગર અને એક્ટ્રેસ જસલીન મથારુ સમક્ષ પોતાનો પ્રેમ વ્યક્ત કર્યો. આ પહેલા જસલીને પણ આ વાતનો ખુલાસો કર્યો હતો. જસલીને જણાવ્યું કે, તે અને અનૂપ જલોટા પાછલા 3 વર્ષથી કપલ તરીકે સાથે છે અને તેમના માતા-પિતાને આ વાતની જાણ નથી.

ઘણાં લોકોને લાગતુ હતુ કે બિગ બૉસમાં જવાને કારણે અને જસલીન સાથેના રિલેશન જાહેર થવાને કારણે અનૂપ જલોટાની ઈમેજ ખરાબ થઈ ગઈ છે. પરંતુ જે પ્રકારની જાણકારી મળી રહી છે તે સાચી હોય તો અનૂપ જલોટાના શૉની ડિમાન્ડ વધી ગઈ છે. એક મીડિયા રિપોર્ટ અનુસાર, એક સૂત્રએ જણાવ્યું કે, તે હંમેશાથી એક લોકપ્રિય ગાયક રહ્યા છે, પરંતુ બિગ બૉસમાં આવ્યા પછી તેમની ડિમાન્ડ વધી ગઈ છે.

અનૂપ જલોટાના મેનેજરે પણ કહ્યું છે કે, હવે લોકો અનૂપ જલોટાના શૉ માટે વધારે ફી આપવા માટે પણ તૈયાર થઈ ગયા છે. પહેલા અનૂપ જલોટા એક કોન્સર્ટ માટે 7-8 લાખ રુપિયા લેતા હતા, જે હવે વધીને 12 લાખ રુપિયા અને તેનાથી પણ વધારે પહોંચી ગયા છે. અનૂપ જલોટા માટે લોકોમાં ઉત્સુકતા વધી ગઈ છે.

પ્રાપ્ત જાણકારી અનુસાર, અનૂપ જલોટા 27 ઓક્ટોબરના રોજ કેલિફોર્નિયામાં શૉ કરવાના છે અને કહેવામાં આવી રહ્યું છે કે તે પહેલા તે ઘરમાંથી બહાર આવી શકે છે. તેમના પ્રવક્તાએ જણાવ્યું કે, અમારે અમુક શૉ કેન્સલ કરવા પડ્યા છે. જો તે 27 ઓક્ટોબર પહેલા ઘરમાંથી બહાર આવે છે તો શૉ કરવા માટે અમેરિકા ચોક્કસ જશે.