સૌરાષ્ટ્ર-કચ્છ
News of Tuesday, 17th May 2022

જામનગરની ૭ મહિનાની હેતાંશી ભટ્ટીને ગંભીર બિમારી : ૧૬ કરોડના ઇન્‍જેકશનની જરૂર

‘હેતાંશીની વહારે આવો' અભિયાન શરૂ કરાયુ : વિવાન અને ધૈર્યરાજની જેમ જ લોકો સહયોગ આપે તેવી પરિવારજનોની અપીલ : કેન્‍દ્ર - રાજ્‍ય સરકાર પાસે આશા

જામનગરની ૭ મહિનાની હેતાંશી સ્‍પાઈનલ મસ્‍ક્‍યુલર એન્‍ટ્રોફી પ્રકાર - ૧ (SMA-1) નામની ગંભીર બીમારી સામે ઝઝૂમી રહી છે. હોસ્‍પિટલમાં માતા પિતા વચ્‍ચે ઝઝૂમતી બાળકી ને સારવાર માટે ૧૬ કરોડના ઇન્‍જેક્‍શનની જરૂરિયાત છે. (તસવીર : કિંજલ કારસરીયા, જામનગર)

(મુકુંદ બદિયાણી દ્વારા) જામનગર તા. ૧૭ : જામનગરના ભટ્ટી પરિવારની ૭ મહિનાની એકમાત્ર લાડલી હેતાંશી સ્‍પાઈનલ મસ્‍ક્‍યુલર એન્‍ટ્રોફી પ્રકાર - ૧ (SMA-1) નામની ગંભીર બીમારી સામે ઝઝૂમી રહી છે. તેમની સારવાર માટે હાલ ગુરુ ગોવિંદસિંહ સરકારી હોસ્‍પિટલમાં તબીબો ખડે પગે સારવાર આપી રહ્યા છે. અત્‍યંત ગંભીર પ્રકારની આ બીમારીમાં સામાન્‍ય પરિવાર ને આવી પડેલ આફત માં ૧૬ કરોડ રૂપિયાના ઝોલ્‍જેન્‍સમાં ઇન્‍જેક્‍શનની સારવાર માટે તાતી જરૂર છે. તેવું તબીબો જણાવી રહ્યા છે.

જામનગરમાં રહેતા સુમિત ભાઈ નારણભાઈ ભટ્ટી અને તેના પત્‍ની કિંજલબેન સુમિતભાઈ ભટ્ટીને લગ્નના ૫ વર્ષના સમયગાળા દરમ્‍યાન હેતાંશી નામની દીકરીનો ૨ ઓકટોબર,૨૦૨૧ના જન્‍મ થયો હતો. ૭ મહિના પહેલા જન્‍મેલી હેતાંશીને અઢી મહિનાથી જ તબિયત ખૂબ નાદુરસ્‍ત હોવાથી હોસ્‍પિટલમાં સારવાર ચાલી રહી છે.

સ્‍કૂલમાં શિક્ષક તરીકે ફરજ બજાવતા સુમિતભાઈ ભટ્ટીના પરિવારજનોમાં ૪ સભ્‍યોમાં હેતાંશીનો જન્‍મ થતાં ખૂબ ખુશી હતી. પરંતુ એકા-એક હેતાંશીને છેલ્લા ચાર થી પાંચ મહિનાથી ખૂબ જ તબિયત નાદુરસ્‍ત રહેતા પરિવાર ઉપર ચિંતાનું મોજું ફરી વળ્‍યું છે. એક તરફ ૭ મહિનાની હેતાંશી ને જી જી સિવિલ હોસ્‍પિટલમાં સારવાર અપાઇ રહી છે. ત્‍યારે તાજેતરમાં જ હેતાંશી ને SMA-1 બિમારી હોવાનો રિપોર્ટ આવતાં પરિવાર ઉપર વજ્રઘાત થયો છે. કારણ કે, આ બીમારી માટે ખૂબ જ ખર્ચાળ સારવાર કરવી પડે તેમ છે. અને ટક નું ખાઈને ટક નું રોડવતા આ પરિવારને નાની લાડકી દીકરી હેતાંશીને ગંભીર પ્રકારની આ બીમારીમાં સારવાર માટે ૧૬ કરોડ રૂપિયાના માતબર રકમના ઝોલ્‍જેન્‍સમાં ઇન્‍જેક્‍શનની તાતી જરૂરિયાત હોવાનું તબીબોએ મત વ્‍યક્‍ત કર્યો છે.

જામનગરની હેતાંશી માટે ગંભીર પ્રકારની આ બીમારીમાં સારવાર મેળવવા ઝોલ્‍જેન્‍સમાં ઇન્‍જેક્‍શન માટે ૧૬ કરોડનો ખર્ચ થાય તે માટે પરિવારજનો પણ સક્ષમ નથી ત્‍યારે અગાઉ વિવાન અને ધૈર્યરાજની જેમ જ બાળકી હેતાંશીને પણ લોકો હેતભેર પોતાના આશીર્વાદ આપી સહયોગ આપે તેવી પરિવારજનોએ પોતાની દીકરીના નવજીવન માટે લોકોને યથાશકિત સહાય માટે લાગણી વ્‍યક્‍ત કરી છે.

જામનગરની ગુરુ ગોવિંદસિંહ હોસ્‍પિટલના પીડિયાટ્રીક વિભાગના વડા ડો. ભદ્રેશ વ્‍યાસ અને ડો. સોનલ શાહ સારવાર કરી રહ્યા છે. ત્‍યારે તેઓના જણાવ્‍યા અનુસાર બાળકીની દિવસેને દિવસે નાદુરસ્‍ત તબિયતમાં તાત્‍કાલિક આ ગંભીર બીમારીમાં ખૂબ જ કીમતી ઝોલ્‍જેન્‍સમાં ઇન્‍જેકશન આપવાથી ઘણી રાહત મળી શકે તેમ છે. તેવો મત વ્‍યક્‍ત કર્યો છે. જી.જી. હોસ્‍પિટલ તંત્ર દ્વારા પણ ખાનગી રાજય સરકારમાં રજૂઆત કરવામાં આવી છે.

જામનગરની ૭ મહિનાની હેતાંશીને નવજીવન આપવા માટે લોકો પણ આગળ આવે અને આ બાળકીને બચાવવાની મુહિમમાં જોડાઈ ‘હેતાંશીની વહારે આવો' અંતર્ગત ઇમ્‍પેકટગુરુ ના હેતાંશી માટે ચાલી રહેલા કેમ્‍પેનમાં યથાશક્‍તિ યોગદાન આપી નવજીવન આપવા અપીલ કરવામાંઆવી છે.

વધુ જાણવા માટે કૃપા કરીને લિંક તપાસો :https://www. impactguru.com/fundraiser /help-hetanshi-sumitbhai-bhatti

ફંડ એકઠું કરનારના બેંક ખાતામાં સીધા ટ્રાન્‍સફર કરી શકો છો. વધુમાં INR ટ્રાન્‍સફરની પણ મંજૂરી છે.

ખાતાનું નામ : હેતાંશી સુમિતભાઈ ભટ્ટી

એકાઉન્‍ટ નંબર : 700701717365616

IFSC કોડ : YESB0CMSNOC

(B પછીનો અંક શૂન્‍ય છે અને N પછીનો અક્ષર નારંગી માટે O છે)

UPI ટ્રાન્‍ઝેક્‍શન માટે: supporthetanshi1@yesbankltd

યસ બેંક UPI દ્વારા દાન અને એકાઉન્‍ટ ટ્રાન્‍સફર ઇમ્‍પેક્‍ટગુરુ સાથે કરી શકાય છે.

(11:06 am IST)