Gujarati News

રાજકોટ,તા. ૩૦: રાજકોટ સહિત સૌરાષ્ટ્ર-કચ્છમાં છેલ્લા બે-ત્રણ દિવસથી શિયાળાનો માહોલ ધીમે-ધીમે જામતો હોય તેવું વાતાવરણ છવાઇ જાય છે. અને લઘુતમ તાપમાનનો પારો નીચે ઉતરે છે.

આજે પણ વહેલી સવારે સામાન્ય ઠંડકની અસર યથાવત  રહી હતી.

શિયાળાએ ગુજરાતમાં દસ્તક દીધી છે અને  હવે સવારમાં ઠંડીનો અહેસાસ થવા લાગ્યો છે. બપોર પારો ૩૬ ડિગ્રીની આસપાસ પહોંચી જતા ગરમીનો પણ અનુભવ થઈ રહ્યો છે. એટલે કે ઠંડીમાં ગરમીનો એહસાસ થતા ડબલ ઋતુ અનુભવાઇ રહી છે. આ સ્થિતિમાં શરદી, ઉધરસ, વાયરલ ફિવરના કેસમાં નોંધપાત્ર વધારો થઇ રહ્યો છે. કાલે અમદાવાદનું તાપમાન ગગડી સિઝનમાં પહેલીવાર ૧૮.૪ ડિગ્રી સુધી પહોંચી જતા પરોઢે ફૂલ ગુલાબી ઠંડીનો અહેસાસ થયો હતો. ૧૫.૫ ડિગ્રી સાથે વલસાડ રાજયનું સૌથી ઠંડુ શહેર બન્યું હતું.

હાલમાં જે રીતે કોરોના વાયરસનું સંકમણ વધી રહ્યું છે જેના કારણે આરોગ્ય તંત્રની ચિંતા વધી છે. શિયાળો આવતા આ ચિંતામાં વધુ વધારો થાય તેવું લાગી રહ્યું છે. કારણ કે હાલમાં સવારમાં ફુલગુલાબી ઠંડીનો અનુભવ લોકોને થઇ રહ્યો છે અને બપોર થતા અસહ્ય ગરમી પડે છે એટલે ડબલ ઋતુના ચક્કરમાં લોકો અટવાયા છે.

છેલ્લા કેટલાક દિવસોથી સામાન્ય વાયરલ ફીવર, શરદી અને ખાંસીની તકલીફો વાળા દર્દીઓમાં નોંધપાત્ર વધારો થઇ રહ્યો છે. ડબલ ઋતુનો અનુભવ હાલ થઈ રહ્યો છે ત્યારે વહેલી સવારે લોકોએ કુલર અને એસીનો ઉપયોગ ટાળવો જોઈએ. ઠંડો ખોરાક અને ઠંડા પીણાંનો ઉપયોગ લોકોએ ટાળવો જોઈએ. સાથે સાથે લોકોએ ગરમ પાણીના કોગળા સવાર સાંજ કરવા જોઈએ. તેમજ જો સામાન્ય શરદી, ઉધરસ કે તાવ હોય તો તેને પણ હળવાશમાં ના લેવું જોઈએ. લોકો જાતે નક્કી ના કરે કે સામાન્ય શરદી, ઉધરસ છે તેના કરતાં તરત ડોકટરનો સંપર્ક કરે તેવી સલાહ પણ તબીબો આપી રહ્યા છે. નોંધનીય છે કે, છેલ્લા કેટલાક દિવસોથી રાજયના વિવિધ શહેરના લધુતમ તાપમાનમાં સતત ઘટાડો થઇ રહ્યો છે. આજે પણ રાજયના વિવિધ શહેરના લદ્યુતમ તાપમાન ૨૦ ડિગ્રીની આસપાસ નોંધાતા વહેલી સવારે ઠંડકનો અહેસાસ લોકોએ કર્યો હતો.

ગઇ કાલે અમદાવાદ ૧૮.૪, ડીસા ૧૬.૮, વડોદરા ૨૦.૨, રાજકોટ ૧૯.૧, કેશોદ ૧૭.૨, ભાવનગર ૨૧.૪, પોરબંદર ૨૦.૬, ભૂજ ૨૦.૪, નલિયા ૧૬.૯, સુરેન્દ્રનગર ૨૦.૨, કંડલાા ૧૯.૩, ગાંધીનગર ૧૬.૫,વલસાડ ૧૫.૫, વિધાનગરમાં ૨૧ ડિગ્રી લઘુતમ તાપમાન નોંધાયું હતું.