Gujarati News

Gujarati News

News of Saturday, 23rd January 2021

જાસૂસ તરીકે પાકિસ્તાનની જેલમાં ૧૨ વર્ષથી કેદ કચ્છના ઈસ્માઈલનો છુટકારો : વાઘા બોર્ડર થી કચ્છના ખાવડા પાસે આવેલા નાના દિનારા ગામે પહોંચશે

(વિનોદ ગાલા દ્વારા)ભુજ : (ભુજ) કુલભૂષણ જાધવની જેમ જાસૂસીના આરોપસર પાકિસ્તાની જેલમાં કેદ ઇસ્માઇલ સમા હવે ૧૨ વર્ષે પોતાના વતન કચ્છ પરત ફરશે. સરહદી વિસ્તાર ખાવડા પાસે આવેલ પોતાના ગામ નાના દીનારાથી ઢોર ચરાવતા ચરાવતા પાકિસ્તાનની હદમાં ઘુસી ગયેલા ઇસ્માઇલ સમા પાકિસ્તાનની રેન્જર ના હાથમાં ઝડપાઈ ગયો હતો. વર્ષ ૨૦૦૮ માં ઝડપાયેલા પશુપાલક એવા ઇસ્માઇલ ને સ્વપ્નમાં પણ કલ્પના નહીં હોય કે તેના ઉપર જાસૂસીનો આરોપ લાગશે અને તેને પોતાનું જીવન જેલની કાળ કોટડીમાં પસાર કરવું પડશે. ઇસ્માઇલ સામે ભારતીય ઇન્ટેલિજન્સ એજન્સી વતી જાસૂસી કરવાના આરોપ અંગે કેસ ચલાવવામાં આવ્યો હતો. વર્ષ ૨૦૧૧માં તેને પાકિસ્તાનની કોર્ટે દ્વારા પાંચ વર્ષની સજા પણ કરવામાં આવી હતી. પરંતુ, સજા કાપ્યા પછી પણ ઇસ્માઇલને મુક્ત કરવામાં આવ્યો ન હતો. એટલે, તેના પરિવારજનો, સ્થાનિક સાંસદ વિનોદ ચાવડા સહિત દીનારા ગામના આગેવાનો દ્વારા સતત ભારત સરકારમાં રજૂઆતો કરાઈ હતી. જેને પગલે ભારતીય વિદેશ મંત્રલાયે આ અંગે પાકિસ્તાન સરકાર સમક્ષ ઇસ્માઇલ ને છોડી મૂકવા રજુઆત પણ કરી હતી. જેને પગલે પાકિસ્તાન ઉપર દબાણ આવતા અંતે હવે, કચ્છનાં ઇસ્માઇલને મુક્ત કરવામાં આવ્યો છે.

 ૨૦૦૮ થી સતત બાર વર્ષ સુધી પાકની જેલમાં રહેલા ઇસ્માઇલને સિંધ પ્રાંત સહિત અનેક જગ્યાએ ફેરવવામાં આવ્યો હતો. આઈએસઆઈથી માંડીને પાક આર્મી અને રેંજર્સ દ્વારા તેની ખૂબ જ આકરી કહી શકાય તેવી પૂછપરછ કરવામાં આવી હતી. બાર વર્ષ પાક જેલમાં રહેવાની કારણે ભારત પણ ઇસ્માઇલની બાબતે ચિંતિત છે. એટલે હાલમાં વાઘા બોર્ડરે તેની કડક ચકાસણી કરવામાં આવી રહી છે. જેને પગલે ઇસ્માઇલને કચ્છના પોતાના નાના દીનારા ગામે પહોંચતાં હજુ બે થી ત્રણ દિવસ લાગી શકે છે.

(7:45 pm IST)
  • અમેરિકન બ્રોડકાસ્ટિંગ લિજેન્ડ લેરી કિંગનું લોસ એન્જલસમાં સીડર-સિનાઈ મેડિકલ સેન્ટરમાં નિધન થયું છે. અહેવાલ મુજબ તેઓને COVID19 પોઝિટિવ આવતા હોસ્પિટલમાં દાખલ કરાયા હતા. તેઓ 87 વર્ષના હતા. access_time 7:03 pm IST

  • કોરોના કેસોમાં, દેશમાં કેરળ અને મહારાષ્ટ્ર સતત ટોચ ઉપર : છેલ્લા ૨૪ કલાકમાં કેરળમાં ૭ હજાર આસપાસ અને મહારાષ્ટ્રમાં ૩૦૦૦ આસપાસ નવા કોરોના કેસ નોંધાયા : આસામમાં સૌથી ઓછા ૧૭, હિમાચલમાં ૪૧, ગોવામાં ૭૦, ઝારખંડ ૭૫, જમ્મુ અને કાશ્મીર ૮૮, ઉત્તરાખંડ ૧૧૦ કેસ નોંધાયા છે : ૪૫૧ નવા કેસ સાથે દેશભરમાં ગુજરાત છઠ્ઠા નંબરે access_time 11:33 am IST

  • નરેન્દ્રભાઇ બંગાળના પ્રવાસે : પશ્ચિમ બંગાળમાં ચૂંટણીઓને લઇ રાજકારણ ગરમાયું: આજે નરેન્દ્રભાઇ મોદી પશ્ચિમ બંગાળના પ્રવાસેઃ કોલકત્તામાં પરાક્રમ દિવસની ઉજવણીમાં ભાગ લેશે access_time 12:52 pm IST