Gujarati News

મોરબી : મોરબીની સિવિલ હોસ્પિટલમાં કોરોનાની બીજી લહેર દરમિયાન માનવ સેવાનું ઉમદા કાર્ય કરનાર સેવાભાવી મહિલાને કચ્છ-મુન્દ્રાના એક મુક સેવેકે એમ્બ્યુલન્સ અર્પણ કરી છે. જો કે આ વ્યક્તિએ સેવાભાવી મહિલાને તેમની સેવા બદલ રોકડ પુરસ્કાર આપવાનું કહ્યું હતું. પણ તેનો મહિલાએ ઇનકાર કરીને ગરીબ દર્દીઓની સેવા માટે એમ્બ્યુલન્સની માંગણી કરતા મુન્દ્રાના એ વ્યક્તિએ તેમની આ ઈચ્છા પૂરી કરી હતી.

 મોરબી સિવિલ હોસ્પિટલમાં વર્ષોથી ગરીબ દર્દીઓની સેવા કરતા હસીનાબેને કોરોનાની બીજી લહેરમાં કોરોનાથી મૃત્યુ પામેલા વ્યક્તિઓના મૃતદેહોની અંતિમવિધિ માટે ઉમદા માનવ સેવા કરી હતી. અને આ અંગેના વીડિયો ન્યુઝ મોરબી અપડેટ દ્વારા પ્રસારિત થયા હતા. આ વીડિયો ન્યુઝ કચ્છ મુન્દ્રાના એક વ્યક્તિએ જોઈને મોરબીના સેવાભાવી મહિલાની માનવ સેવાથી પ્રભાવિત થયા હતા અને તે વ્યક્તિએ હસીનાબેનને મુન્દ્રા બોલાવી તેમનું સન્માન પણ કર્યું હતું. સાથોસાથ આ વ્યક્તિએ હસીનાબેનને રોકડ પુરસ્કાર આપવાનું નક્કી કર્યું હતું. પણ હસીનાબેને રોકડ રકમ ન સ્વીકારી અને તેના બદલામાં મોટી મૃતદેહ લઇ જવાની એમ્બ્યુલન્સની માંગણી કરી હતી. આથી તે વ્યક્તિએ આ માગણી સહર્ષ સ્વીકારી ચાર મૃતહેદ લઈ જઈ શકાય તેવી એમ્બ્યુલન્સ હસીનાબેનને સેવા માટે ભેટ આપી છે.