Gujarati News

રાજકોટ તા. ૨૮: મોરબી રોડ પર બેડી ચોકડી નજીક સવારના પહોરમાં સામા કાંઠાના ગોકુલનગરના રબારી યુવાનને આંતરી બામણબોરથી બોલેરોમાં આવેલા શખ્સોએ ધોકા-પાઇપના ઘા ફટકારી હાથ-પગ ભાંગી નાંખતાં હોસ્પિટલમાં ખસેડાયો છે.

જાણવા મળ્યા મુજબ સંત કબીર રોડ પર ગોકુલનગર-૪માં રહેતો વિપુલ બેચરભાઇ સાંબડ (ઉ.વ.૨૭) સવારે બાઇક લઇને કામે જવા નીકળ્યો ત્યારે મોરબી રોડ બેડીના પુલ નજીક તેને માલવાહક બોલેરોમાં આવેલા શખ્સોએ આંતરી ઝઘડો કરી પાઇપ-ધોકાના આડેધડ ઘા ફટકારતાં ફ્રેકચર જેવી ઇજાઓ થતાં સિવિલ હોસ્પિટલમાં ખસેડવામાં આવતાં હોસ્પિટલ ચોકીના સ્ટાફે બી-ડિવીઝનમાં જાણ કરી હતી.

વિપુલ છુટક કામ કરે છે અને પરિણીત છે. તેના કહેવા મુજબ હુમલો કરનારામાં એક બામણબોરના હાજાભાઇ હતાં. અગાઉના કોઇ બાબતના જુના મનદુઃખ આ હુમલા પાછળ કારણભુત હોવાનું સામે આવ્યું હોઇ પોલીસે વિશેષ તપાસ હાથ ધરી છે.