Gujarati News

રાજકોટ તા.૧૭ : અત્રેના કાલાવાડ રોડ ઉપર આવેલ શકિતનગર શેરી નં.૩ સહિતના વિસ્તારોમાં વાલ્વમેન નિર્ધારીત સમય જાળવતા ન હોવાને કારણે પાણી અનિયમિત સમયે આવવાની રહીશોમાં ફરિયાદ ઉઠી છે.

આ વિસ્તારમાં રહેતા લોકોએ ફરિયાદમાં જણાવ્યુ છે કે શકિતનગર મેઇન રોડ સહિત  શેરી નં.૩માં પાણીનો નિર્ધારીત સમય પ-૪૦નો છે પરંતુ વાલ્વમેન પોતાની મરજી મુજબ અને પોતાની ઇચ્છા મુજબ વાલ્વ ચાલુ બંધ કરતા હોવાને કારણે આ વિસ્તારમાં રોજેરોજ પાણી વહેલા મોડુ મળવાની નોબત આવે છે. જેને કારણે ગૃહીણીઓની મુશ્કેલીમાં વધારો થવા પામ્યો છે. લોકોએ કરેલી ફરિયાદમાં જણાવ્યુ છે કે છેલ્લા એક મહિનાથી આ વિસ્તારમાં અનિયમિત સમયે પાણી મળી રહ્યુ છે હવે આ બાબતે યોગ્ય કરવાની ખાસ જરૂર ઉભી થઇ છે. જો આ બાબતે યોગ્ય કરવામાં નહી આવે તો કમિશ્નર સહિત ઉચ્ચ સત્તાવાળઓને સામુહિક ધોરણે ફરિયાદ કરવા જવાનુ પણ રહીશોએ નક્કી કરેલ છે. આ વિસ્તારના કોર્પોરેટરોએ પણ આ બાબત ધ્યાને લઇ યોગ્ય કરવુ જોઇએ તેવી પણ માંગણી કરવામાં આવી છે. રહીશોનું કહેવુ છે કે જો વાલ્વમેન મરજી મુજબ વર્તન કરતા હોય તો તેની સામે પણ કાર્યવાહી થવી જોઇએ.