Gujarati News

રાજકોટ,તા. ૧૬ : મ.ન.પા. દ્વારા સતત બીજા વર્ષે દિવાળી ઉપર આતશબાજીનો કાર્યક્રમ રદ કરવામાં આવ્યો છે.

આ અંગે મેયર ડો.પ્રદિપ ડવ, સ્ટેન્ડિંગ કમિટી ચેરમેન પુષ્કરભાઇ પટેલ, તથા સમાજ કલ્યાણ સમિતિ ચેરમેન પરેશભાઈ પીપળીયા એક સંયુકત યાદીમાં જણાવે છે કે, શહેરના ગરીબ અને મધ્યમવર્ગના બાળકો, શહેરીજનો, અવનવા ફટાકડાની આતશબાજી માણી શકે તેવા શુભ હેતુથી રાજકોટ મહાનગરપાલિકા દ્વારા છેલ્લા આશરે બાર વર્ષથી વધુ સમયથી દિવાળીના તહેવારો દરમ્યાન ધનતેરસના શુભ દિવસે ભવ્ય આતશબાજીનું આયોજન કરે છે. આતશબાજીમાં બાળકો, ભાઈ-બહેનો મળી લાખો લોકો આતશબાજીનો લાભ લે છે.

પરંતુ છેલ્લા બે વર્ષોથી કોરોનાની વૈશ્વિક મહામારીને કારણે ગતવર્ષે પણ આતશબાજીનો કાર્યક્રમ મુલતવી રાખવામાં આવેલ. હાલમાં પણ કોરોના સંપૂર્ણ નાબુદ થયેલ નથી. તેમજ આતશબાજીમાં શહેરીજનો, બાળકો લાખોની સંખ્યામાં ઉપસ્થિત રહેતા હોય છે. જેના કારણે કોઈ જોખમ ઉભું ન થાય તેવા શુભ આશયથી ચાલુ વર્ષે દિવાળી તહેવારના અનુસંધાને આતશબાજી યોજવામાં આવનાર નથી.