Gujarati News

રાજકોટ, તા. ૧૦ : લોધીકાના નગરપીપળીયાના કાકા-ભત્રીજાને હનીટ્રેપમાં ફસાવી તોડનો કારસો રચનાર રાજકોટની યુવતી સીહત ૬ શખ્સોને કોર્ટે ત્રણ દિ'ના રીમાન્ડ પર સોંપવા હુકમ કર્યો છે.

પ્રાપ્ત વિગતો મુજબ લોધીકાના નગરપીપળીયાના ગામે રહેતા ગોરધનભાઇ ચનાભાઇ તારપરાના ભત્રીજા દિનેશની સગાઇ કરવાની હોય સગાઇના બહાને આ કાકા-ભત્રીજાને હનીટ્રેપમાં ફસાવી ૪.૭પ લાખનો તોડનો પ્રયાસ કરનાર રણજીત રતીભાઇ મકવાણા રહે. સત્યમ પાર્ક જકાત નાકા પાસે રાજકોટ તથા જયપાલસિંહ વનરાજસિંહ જાડેજા રે. રેલનગર શેરી નં.ર, પોપટપરા રાજકોટ  મૂળ રે. લુણીવાવ તા. ગોંડલ (નકલી પોલીસની ઓળખ આપનાર) તેમજ આ ટોળકીના મુખ્ય સૂત્રધાર રમેશ લખમણભાઇ રામાણી રહે. નગરપીપળીયા, મનસુખ કુરજીભાઇ લીંબાસીયા, નિવૃત પીએસઆઇનો પુત્ર વિજયસિંહ રણજીતસિંહ મકવાણા રજપૂત રે. પોપટપરા-૧૧, રાજકોટ અને ફાલ્ગુની દિલીપભાઇ જોબનપુત્રા રે. જંકશન પ્લોટ ૧પ/ર રેલ્વે સ્ટેશન પાસે રાજકોટને લોધીકાના પીએસઆઇ હર્ષાબેન પી. ગઢવી તથા સ્ટાફે ઝડપી લઇ ગઇકાલે ધરપકડ કરી હતી.

હનીટ્રેપ કરતા પકડાયેલ ઉકત તમામને રીમાન્ડની માંગણી સાથે ગઇકાલે કોર્ટમાં રજુ કરાતા કોર્ટે ત્રણ દિ'ના રીમાન્ડ પર સોંપવા હુકમ કર્યો હતો.

તપાસનીશ અધિકારી હર્ષાબને પી. ગઢવીએ જણાવ્યું હતું કે, આ ટોળકીએ નગરપીપળીયા સિવાય અન્ય કોઇને હનીટ્રેપમાં ફસાવી તોડ કર્યા છે કેમ ? તે અંગે તમામની પૂછતાછ હાથ ધરાઇ છે તેમજ તમામ શખ્સોના ગુન્હાહિત ઇતિહાસ અંગે પણ તપાસ હાથ ધરાઇ છે.