અમેરિકામાં ગુજરાતી દંપતી પર ફાયરીંગ થતા પત્નિનું કરૂણ મોત
અમેરિકાના મેરીલેન્ડમાં મુળ સુરતના રહીશ દંપતિ પર લૂંટના ઇરાદે ફાયરીંગ કર્યુ હતું
ન્યૂજર્સી: અમેરિકામાં લૂંટના ઈરાદે ગુજરાતીઓ પર હુમલો અને ગોળી મારીને હત્યા કરવાની ઘટનાઓ અવારનવાર સામે આવતી રહે છે, ત્યારે આજે વધુ એક સુરતના દંપતી પર લૂંટના ઈરાદે ફાયરિંગની ઘટના સામે આવી છે. અમેરિકાના મેરિલેન્ડમાં સ્થાઈ થયેલા ગુજરાતી દંપતી પર ફાયરિંગમાં પત્નીનું મોત નીપજ્યું છે, જ્યારે પતિને ગંભીર હાલતમાં સારવાર અર્થે ખસેડવામાં આવ્યા છે.
આ અંગે પ્રાપ્ત વિગતો મુજબ, મૂળ સુરતના ભરથાણાનો કણબી પટેલ પરિવાર છેલ્લા 20 વર્ષથી અમેરિકામાં સ્થાઈ થયો છે. અહીંના મેરીલેન્ડમાં તેઓ મોટેલના બિઝનેશ સાથે સંકળાયેલા છે. શુક્રવારે દિલીપ અને તેમના પત્ની ઉષા પટેલ પોતાની હોટલ પર હતા. આ દરમિયાન કેટલાક અજાણ્યા શખ્સો અચાનક હોટલમાં ઘૂસી આવ્યા હતા અને લૂંટના ઈરાદે દંપતિ પર ફાયરિંગ કરીને ફરાર થઈ ગયા હતા.
હુમલા બાદ ઈજાગ્રસ્ત દંપતીને તાત્કાલીક સારવાર માટે નજીકની હોસ્પિટલમાં ખસેડવામાં આવ્યા હતા. જ્યાં ઉષાબેનનું મોત નીપજ્યું હતુ, જ્યારે દિલીપભાઈની સારવાર ચાલી રહી છે. આ અંગેની જાણ થતાં સુરતમાં રહેતા તેમના પરિવારમાં ગમગીની છવાઈ ગઈ છે.