દેશમાં 15-18 વર્ષની વય જૂથના 60 ટકાથી વધુ બાળકોને કોરોનાનો પ્રથમ ડોઝ મળ્યો

દેશની 95 ટકા પાત્ર વસ્તીને કોવિડ -19 રસીનો પ્રથમ ડોઝ અપાયો :કેન્દ્રીય સ્વાસ્થ્ય મંત્રી ડૉ.મનસુખભાઈ માંડવિયાએ માહિતી આપી

નવી દિલ્હી : દેશમાં 15-18 વર્ષની વય જૂથના 60 ટકાથી વધુ બાળકોને કોરોનાનો પ્રથમ ડોઝ આપવામાં આવ્યો છે. કેન્દ્રીય સ્વાસ્થ્ય મંત્રી ડૉ.મનસુખભાઈ માંડવિયાએ આ માહિતી આપી હતી. કેન્દ્રીય આરોગ્ય મંત્રી ડો.મનસુખભાઈ માંડવિયાએ જણાવ્યું હતું કે રસીકરણ કરાવનાર મારા તમામ યુવા મિત્રોને અભિનંદન.

અગાઉ, કેન્દ્રીય આરોગ્ય મંત્રાલયે ગુરુવારે કહ્યું હતું કે 95 ટકા પાત્ર વસ્તીને કોવિડ -19 રસીનો પ્રથમ ડોઝ આપવામાં આવ્યો છે. દેશમાં રસીકરણ અભિયાન હેઠળ અત્યાર સુધીમાં કોવિડ-19 રસીના 164.44 કરોડથી વધુ ડોઝ આપવામાં આવ્યા છે. જેમાં 15-18 વર્ષની વય જૂથના 4,42,81,254 બાળકોનો સમાવેશ થાય છે જેમને તેમનો પ્રથમ ડોઝ મળ્યો છે.

કેન્દ્રીય આરોગ્ય અને પરિવાર કલ્યાણ મંત્રી ડૉ.મનસુખભાઈ માંડવિયાએ આ નોંધપાત્ર સિદ્ધિ બદલ રાષ્ટ્રને અભિનંદન પાઠવ્યા હતા. તેમણે ટ્વીટ કર્યું કે ભારતે તેની લાયક વસ્તીના 95 ટકાથી વધુ લોકોને કોવિડ-19 રસીનો પ્રથમ ડોઝ આપવાનો રેકોર્ડ હાંસલ કર્યો છે. વધુમાં કહ્યું કે, વડાપ્રધાન મોદીના નેતૃત્વમાં આરોગ્ય કર્મચારીઓની સખત મહેનત અને જનભાગીદારીને કારણે દેશ આ અભિયાનમાં સતત આગળ વધી રહ્યો છે.