મુશ્તાક નડિયાદવાલાના બાળકો અંગે પાકિસ્તાન સરકાર પાસે માહિતી માંગી પરંતુ જવાબ મળ્યો નથી:કેન્દ્ર સરકાર

ભારત સરકારે ઈસ્લામાબાદમાં તેના હાઈ કમિશન દ્વારા ગયા વર્ષે સપ્ટેમ્બરમાં પાકિસ્તાનના વિદેશ મંત્રાલયને નડિયાદવાલાના બંને બાળકોને વકીલો પૂરા પાડવા વિનંતી કરી હતી.

 નવી દિલ્હી : કેન્દ્ર સરકારે બોમ્બે હાઈકોર્ટને જણાવ્યું છે કે તેણે ફિલ્મ નિર્માતા મુશ્તાક નડિયાદવાલાના બાળકો સાથે સંબંધિત દાવા અંગે પાકિસ્તાન સરકાર પાસેથી માહિતી માંગી છે, પરંતુ તેમની તરફથી કોઈ જવાબ મળ્યો નથી.

નડિયાદવાલાએ દાવો કર્યો હતો કે તેની પાકિસ્તાની પત્નીએ વર્ષ 2020થી તેના બે બાળકોને ગેરકાયદેસર રીતે પોતાની સાથે રાખ્યા હતા.

કેન્દ્ર દ્વારા આપવામાં આવેલા સ્ટેટસ રિપોર્ટ અનુસાર, ભારત સરકારે ઈસ્લામાબાદમાં તેના હાઈ કમિશન દ્વારા ગયા વર્ષે સપ્ટેમ્બરમાં પાકિસ્તાનના વિદેશ મંત્રાલયને નડિયાદવાલાના બંને બાળકોને વકીલો પૂરા પાડવા વિનંતી કરી હતી.

ભારત સરકારે પાકિસ્તાન સરકારને પૂછ્યું છે કે બંને બાળકો ક્યાં છે અને તેમના વિઝા અને નાગરિકતા સંબંધિત માહિતી પણ માંગી છે. રિપોર્ટ અનુસાર, તેમને ઓક્ટોબર 2022 અને ફેબ્રુઆરી 2023માં પણ રિમાઇન્ડર મોકલવામાં આવ્યા છે.

રિપોર્ટ અનુસાર તેમના તરફથી કોઈ જવાબ મળ્યો નથી. આ સિવાય 13 માર્ચ 2023ના રોજ પાકિસ્તાન સરકારને વધુ એક રિમાઇન્ડર મોકલવામાં આવ્યું હતું.

કોર્ટમાં દાખલ કરાયેલી અરજી અનુસાર એપ્રિલ 2012માં નડિયાદવાલાની પત્ની મરિયમ ચૌધરી લગ્ન બાદ ભારત આવી હતી. નવેમ્બર 2020 માં તે બંને બાળકો સાથે પાકિસ્તાન ગઈ હતી અને ત્યાં એક અરજી દાખલ કરીને બાળકોના વાલી નક્કી કરવા વિનંતી કરી હતી.

આ પહેલા બોમ્બે હાઈકોર્ટે કેન્દ્રને નડિયાદવાલાના બાળકોને શોધી કાઢવા કહ્યું હતું.