શ્રીલંકાની હાલત ખરાબઃ સરકાર પગાર ચૂકવવા અસમર્થઃ હવે નવી નોટો છાપશે અને એરલાઈન્સ પણ વેચશે
શ્રીલંકા નાદારી તરફ આગળ વધી રહ્યું છે
કોલંબો, તા.૧૮: આર્થિક સંકટથી ઘેરાયેલા શ્રીલંકાની નવી સરકારે નાણાકીય ખાધને દૂર કરવા અને દેશની નાણાકીય સ્થિતિને સ્થિર કરવાના પ્રયાસોના ભાગરૂપે નવી યોજનાઓ બનાવી છે.
સરકાર પાસે તેના સરકારી કર્મચારીઓને પગાર આપવા માટે પૈસા નથી, તેથી સરકારે નવી કરન્સી છાપવાનો નિર્ણય લીધો છે.
આ સાથે જ સરકારે રાષ્ટ્રીય એરલાઇનને પણ વેચવાનું મન બનાવી લીધું છે.
વડા પ્રધાન રાનિલ વિક્રમસિંઘે સોમવારે રાષ્ટ્રને સંબોધિત કરતી વખતે જણાવ્યું હતું કે નવી સરકાર શ્રીલંકન એરલાઇન્સનું ખાનગીકરણ કરવાની યોજના ધરાવે છે.
તેમણે કહ્યું કે માર્ચ ૨૦૨૧માં પૂરા થયેલા વર્ષમાં શ્રીલંકન એરલાઈન્સને ૪૫ અબજ રૂપિયાનું નુકસાન થયું હતું.
વિક્રમસિંઘેએ કહ્યું, એવું ન થવું જોઈએ કે આ નુકસાનનો બોજ એવા ગરીબોએ ઉઠાવવો જોઈએ જેમણે કયારેય વિમાનમાં પગ પણ મૂકયો નથી.
વડાપ્રધાને કહ્યું હતું કે સરકારી કર્મચારીઓને પગાર ચૂકવવા માટે તેમને નવી ચલણ છાપવાની ફરજ પડી હતી, જેનાથી દેશના ચલણ પર દબાણ આવશે.
તેમણે કહ્યું કે દેશ પાસે માત્ર એક દિવસનો ગેસોલિન સ્ટોક બચ્યો છે અને સરકાર શ્રીલંકાની દરિયાઈ સરહદ પર લંગરાયેલા ત્રણ ક્રૂડ ઓઈલ જહાજોની ચૂકવણી કરવા માટે ખુલ્લા બજારમાંથી ડોલર એકત્ર કરવાની આશા રાખી રહી છે.
તેણે કહ્યું, આગામી કેટલાક મહિનાઓ અમારા માટે ખૂબ જ મુશ્કેલ છે. આપણે તાત્કાલિક રાષ્ટ્રીય સભા અથવા રાજકીય સંસ્થાની રચના કરવી પડશે જેમાં તમામ રાજકીય પક્ષોએ વર્તમાન કટોકટીનો ઉકેલ લાવવા માટે ભાગ લેવો જોઈએ.
વડા પ્રધાન વિક્રમસિંઘેએ રાષ્ટ્રપતિ રાજપક્ષેના ‘વિકાસ બજેટ'ને બદલે નવું ‘રાહત બજેટ' જાહેર કરવાનું વચન આપ્યું હતું.
વિક્રમસિંઘેએ કહ્યું કે કેબિનેટ ટ્રેઝરી બિલ જારી કરવાની મર્યાદા રૂ. ૩ લાખ કરોડથી વધારીને રૂ. ૪ લાખ કરોડ કરવા સંસદ સમક્ષ પ્રસ્તાવ કરશે.
રાજપક્ષેના રાજીનામાની માંગ કરી રહેલા વિરોધીઓ અને સરકારના સમર્થકો વચ્ચે હિંસક અથડામણો બાદ ગયા અઠવાડિયે વિક્રમસિંઘેને વડાપ્રધાન તરીકે નિયુક્ત કરવામાં આવ્યા હતા.
બેલઆઉટ પેકેજ માટે અરજી કરવા માટે, નાણા પ્રધાનને આંતરરાષ્ટ્રીય નાણાકીય ભંડોળ (IMF) સાથે વાટાઘાટ કરવા અને ભારત અને ચીન સહિત વિવિધ દેશોમાંથી લોનની વ્યવસ્થા કરવા માટે નિમણૂક કરવી પડશે.
સંપૂર્ણ કેબિનેટની ગેરહાજરીમાં સરકારને રોકડ મળશે કે કેમ તે હજુ સ્પષ્ટ નથી.
શ્રીલંકા બે વિદેશી દેવું ચૂકવી શકયું નથી, જેના કારણે દેશ નાદારી તરફ આગળ વધી રહ્યો છે.
વિક્રમસિંઘેએ કહ્યું કે આગામી થોડા દિવસોમાં દેશને ૭૫ મિલિયન ડોલરની જરૂર છે.