રિલાયન્સ સાથેની ડીલ કેન્સલ થયા બાદ
‘બિગ બજાર' ગ્રુપની ખરાબ હાલતઃ કરોડોનું પેમેન્ટ ડિફોલ્ટ !
નવી દિલ્હી, તા.૨: સમય બદલાતા લાંબો સમય નથી લેતો... આ કહેવત આપણે બધાએ આપણા જીવનમાં એક યા બીજા સમયે સાંભળી જ હશે. આપણી આસપાસના કોર્પોરેટ જગતમાં આપણે ઘણી કંપનીઓને સારામાંથી ખરાબ અને ખરાબમાંથી સારા સમય તરફ જતી જોઈ હશે. તાજેતરનો મામલો બિગ બજાર જેવી બ્રાન્ડના માલિક ફયુચર ગ્રુપ સાથે સંબંધિત છે. દેવું ભરેલા આ જૂથની આર્થિક સ્થિતિ હવે એટલી ખરાબ સ્થિતિમાં પહોંચી ગઈ છે કે જૂથની એક-બે નહીં પરંતુ ત્રણ કંપનીઓએ કરોડો રૂપિયાની ચુકવણી ડિફોલ્ટ કરી છે.
ગ્રુપ કંપનીઓ ફયુચર એન્ટરપ્રાઈઝ, ફયુચર કન્ઝ્યુમર અને ફયુચર લાઈફસ્ટાઈલ ફેશન્સ તેમના ધિરાણકર્તાઓના કોન્સોર્ટિયમને વન ટાઈમ રિઝોલ્યુશન સ્કીમની ચુકવણી કરવામાં સક્ષમ નથી.
ફયુચર લાઇફસ્ટાઇલ ફેશન્સે શુક્રવારે માહિતી આપી હતી કે તે રૂ. ૩૩૫.૦૮ કરોડની મૂળ રકમ ચૂકવવામાં સક્ષમ નથી. તેને ચૂકવવાની છેલ્લી તારીખ ૩૦ જૂન ૨૦૨૨ હતી. જેમાં કંપનીને મળેલી ટર્મ લોન, ર્વકિંગ કેપિટલ ટર્મ લોન અને કરોડોના પરચેઝ બિલની ચુકવણીનો સમાવેશ થાય છે. જોકે, કંપનીએ આ લોનનું વ્યાજ ચૂકવી દીધું છે. આ ગ્રુપ કંપની સેન્ટ્રલ અને બ્રાન્ડ ફેક્ટરી જેવા સ્ટોર્સ ચલાવે છે.
ગ્રૂપની ફયુચર એન્ટરપ્રાઈઝ લિમિટેડ કંપનીના નોન-કન્વર્ટિબલ ડિબેન્ચરની મૂળ રકમની ચુકવણી કરવામાં સક્ષમ નથી. આ ચુકવણી ડિફોલ્ટ રૂ ૧૨૬.૧૩ કરોડ છે. એ જ રીતે ફયુચર કન્ઝ્યુમરે પણ રૂ. ૧૭.૨ કરોડની ચૂકવણીમાં ડિફોલ્ટ કર્યું છે. ત્રણેય કંપનીઓએ મળીને લગભગ રૂ. ૪૪૮ કરોડની ચૂકવણીમાં ડિફોલ્ટ કર્યું છે.
આ ત્રણેય ગ્રુપ કંપનીઓ ફયુચર-રિલાયન્સ ડીલનો ભાગ હતી. આ ડીલમાં રિલાયન્સ ગ્રુપને ફયુચર ગ્રુપની કુલ ૧૯ કંપનીઓની માલિકી મળવાની હતી. જેમાં બિગ બજાર જેવી મોટી રિટેલ બ્રાન્ડનો સમાવેશ થાય છે. આ તમામ કંપનીઓ રિટેલ, હોલસેલ, લોજિસ્ટિક્સ અને વેરહાઉસ સેગમેન્ટ સાથે સંકળાયેલી હતી. ફયુચર અને રિલાયન્સની ડીલ ઓગસ્ટ ૨૦૨૦માં થઈ હતી, પરંતુ એમેઝોને કાનૂની વિવાદ ઉઠાવ્યા બાદ આ લડાઈ સુપ્રીમ કોર્ટમાં પહોંચી હતી. છેવટે, એપ્રિલ ૨૦૨૧ માં, રિલાયન્સ ઇન્ડસ્ટ્રીઝે જાહેરાત કરી કે આ ડીલ હવે થઈ શકશે નહીં.