LAC બાદ હવે હિંદ મહાસાગરમાં ચીનની ખોફનાક ચાલ : ભારત માટે મોટો ખતરો- યુએસ રિપોર્ટમાં થયા ખુલાસા
બેઝ પર તૈનાત થશે એરક્રાફ્ટ કેરિયર્સ અને સબમરીન : ચીન પોતાના પરમાણુ હથિયારોનો સ્ટોક વધારે છે અને વર્ષ 2035 સુધીમાં ચીન પાસે 1500થી વધુ ખતરનાક પરમાણુ હથિયારો હશે
ચીનની નજર સતત તેના પાડોશી દેશોની જમીન હડપ કરવા પર હોય છે. પછી તે ગલવાન હોય કે અરુણાચલ પ્રદેશ, દરેક જગ્યાએ ચીને અનેક વખત ઘુસણખોરી કરવાનો પ્રયાસ કર્યો છે. જેના કારણે ભારતીય સેના અને ચીની સેના વચ્ચે તણાવનું વાતાવરણ સર્જાતું રહ્યું છે. LAC બાદ હવે દરિયાઈ સીમામાં પણ ચીન ભારત માટે મોટો પડકાર બની રહ્યું છે. હિંદ મહાસાગર ક્ષેત્રમાં ચીની સેનાની હાજરી ભારતીય નૌકાદળ માટે મુશ્કેલી ઊભી કરી રહી છે. હવે અમેરિકાએ પોતાના ડોઝિયરમાં આ અંગે ઘણા ખુલાસા કર્યા છે.
હાલમાં જ અમેરિકા દ્વારા ચીનને લઈને ડિફેન્સ એન્યુઅલ રિપોર્ટ જાહેર કરવામાં આવ્યો હતો, જેમાં ઘણા ચોંકાવનારા ખુલાસા થયા છે. પેન્ટાગોન દ્વારા જાહેર કરવામાં આવેલા આ રિપોર્ટમાં એ પણ જણાવવામાં આવ્યું છે કે કેવી રીતે ચીન પોતાના પરમાણુ હથિયારોનો સ્ટોક વધારી રહ્યું છે અને વર્ષ 2035 સુધીમાં ચીન પાસે 1500થી વધુ ખતરનાક પરમાણુ હથિયારો હશે. આ અમેરિકન રિપોર્ટમાં જીબૂતી બેઝનો પણ ઉલ્લેખ કરવામાં આવ્યો છે, જ્યાંથી ચીન હિંદ મહાસાગરમાં પોતાની શક્તિ અનેક ગણી વધારી શકે છે.
એનડીટીવીએ તેના એક અહેવાલમાં આ બેઝની સેટેલાઇટ તસવીરો જાહેર કરી હતી, જેમાં જોવામાં આવ્યું હતું કે ચીને અહીં એક વિશાળ જહાજ તૈનાત કર્યું છે, જે યુદ્ધની દૃષ્ટિએ ચીનની સેના માટે ખૂબ જ મહત્વપૂર્ણ છે. હવે અમેરિકાના ચીન વિશેના આ રિપોર્ટમાં એવું પણ કહેવામાં આવ્યું છે કે આ વર્ષે માર્ચમાં જીબૂતી બેઝ પર FUCHI II ક્લાસનું જહાજ હાજર હતું, જે સાબિત કરે છે કે આ બેઝ સંપૂર્ણ રીતે કાર્યરત છે.
રિપોર્ટમાં વધુમાં જણાવવામાં આવ્યું છે કે જીબૂતીમાં ચીની સેના દ્વારા બનાવવામાં આવેલા ઈન્ફ્રાસ્ટ્રક્ચરમાં કોઈપણ એરક્રાફ્ટ કેરિયર અને સબમરીનને તૈનાત કરી શકાય છે. એટલે કે તે ચીની સેના માટે એક મોટા યુદ્ધ બેઝ જેવું છે, જ્યાંથી ચીની સેના કોઈપણ પ્રકારની કાર્યવાહી કરી શકે છે. ચીન નાના દેશોમાં આવા બેઝ શોધી રહ્યું છે જ્યાં તે પોતાનો સૈન્ય મથક સ્થાપિત કરી શકે. આમ કરીને તે બીજા દેશોની સરખામણીમાં પોતાની જાતને મજબૂત બનાવવાનું કામ સતત કરે છે.