Gujarati News

નવી દિલ્‍હી તા. ૩૦ : કોંગ્રેસ અધ્‍યક્ષ પદ માટેની ચૂંટણી આ વખતે રસપ્રદ બની રહી છે. ચૂંટણી માટે નામાંકનનો આજે છેલ્લો દિવસ છે. એટલા માટે આજનો દિવસ ખૂબ જ મહત્‍વપૂર્ણ રહેવાનો છે. મધ્‍યપ્રદેશના પૂર્વ મુખ્‍યમંત્રી, રાજયસભાના સાંસદ દિગ્‍વિજય સિંહ અને કેરળના સાંસદ શશિ થરૂર પોતાનું ઉમેદવારી પત્ર રજૂ કરવા જઈ રહ્યા છે. આ સિવાય મુકુલ વાસનિક, મલ્લિકાર્જુન ખડગે અને કુમારી સેલજા પણ નોમિનેશન ફાઈલ કરી શકે છે. નામાંકન પરત ખેંચવાની છેલ્લી તારીખ ૮ ઓક્‍ટોબર છે. આ દરમિયાન જી-૨૩ જૂથમાંથી અલગ ઉમેદવાર ઊભો કરવાની પણ ચર્ચાઓ શરૂ થઈ ગઈ છે.

રાજસ્‍થાનમાં રાજકીય ઉથલપાથલ બાદ રાજસ્‍થાનના મુખ્‍યમંત્રી અશોક ગેહલોતે પ્રમુખ પદની રેસમાંથી પોતાને બહાર કરી દીધા છે. કોંગ્રેસના વચગાળાના અધ્‍યક્ષ સોનિયા ગાંધીને મળ્‍યા બાદ ગેહલોતે ચૂંટણી લડવાનો ઈન્‍કાર કરી દીધો છે. ગેહલોતના સીએમ તરીકે ચાલુ રહેવા અંગે પણ સસ્‍પેન્‍સ વધુ ઘેરાયેલું છે. પાર્ટી તરફથી કહેવામાં આવ્‍યું છે કે એક-બે દિવસમાં આ અંગે નિર્ણય લેવામાં આવશે.

ગેહલોતે ચૂંટણી લડવાનો ઈન્‍કાર કર્યા બાદ દિગ્‍વિજય આ રેસમાં ઉતર્યા છે. તેમણે સ્‍પષ્ટ કર્યું છે કે તેઓ શુક્રવારે ઉમેદવારી નોંધાવશે. જોકે, એ સ્‍પષ્ટ નથી થયું કે પાર્ટી હાઈકમાન્‍ડે દિગ્‍વિજયને સમર્થન આપ્‍યું છે કે નહીં. દિગ્‍વિજય સિંહે કહ્યું છે કે તેમણે પોતે ચૂંટણી લડવાનો નિર્ણય કર્યો છે. સૂત્રોનું કહેવું છે કે પાર્ટી હાઈકમાન્‍ડ દલિત ઉમેદવારના નામ પર વિચાર કરી રહી છે, જેમાં મલ્લિકાર્જુન ખડગેનું નામ આગળ છે. આ સિવાય મીરા કુમાર, મુકુલ વાસનિક (જી-૨૩) અને કુમારી સેલજાના નામ પણ ચર્ચામાં છે. ખડગે આજે સોનિયા ગાંધીને મળશે. તમામની નજર આ બેઠક પર ટકેલી છે. અહીં શશિ થરૂર (G-23) પોતાનું નામાંકન દાખલ કરશે. દિગ્‍વિજય સિંહ સાથે મુલાકાત કરી હતી અને બંને નેતાઓએ કહ્યું હતું કે તેમની લડાઈ પ્રતિસ્‍પર્ધીઓ વચ્‍ચે નહીં પરંતુ મિત્રો વચ્‍ચે હશે અને આખરે કોંગ્રેસની જીત થશે. દિગ્‍વિજય સિંહે દિવસ દરમિયાન ઉમેદવારી પત્રોના કુલ ૧૦ સેટ એકત્રિત કર્યા. તેમણે કહ્યું કે તેઓ ઉમેદવારી પત્ર ભરશે. ઝારખંડમાં, ભૂતપૂર્વ પ્રધાન કેએન ત્રિપાઠીએ પણ પક્ષના ટોચના પદ માટે નામાંકન પત્રોનો સમૂહ એકત્રિત કર્યો હતો. કોંગ્રેસ અધ્‍યક્ષ પદ માટે ૧૭ ઓક્‍ટોબરે મતદાન થશે અને પરિણામ ૧૯ ઓક્‍ટોબરે જાહેર કરવામાં આવશે.