Gujarati News

નવી દિલ્હી : દિલ્હીમાં રિલાયન્સ સેન્ટ્રોનો ફર્સ્ટ સ્ટોર ખુલ્યો છે. રિલાયન્સ રિટેલ સતત તેનો બિઝનેસ વધારી રહી છે.  આ અંતર્ગત દિલ્હીમાં શરૂ કરાયેલ ૭૫ હજાર ચોરસ ફૂટમાં ફેલાયેલ રિલાયન્સ સેન્ટ્રો એક સંપૂર્ણ ડિપાર્ટમેન્ટલ સ્ટોર છે જેમાં ૩૦૦થી વધુ બ્રાન્ડ પ્રોડક્ટ્સ સાથે ૨૦ હજારથી વધુ સ્ટાઇલ ઓપ્શન ડિસ્પ્લે કરવામાં આવ્યા છે.

દિલ્હીના વસંત કુંજમાં ખોલવામાં આવેલ આ ફેશન અને લાઈફ સ્ટાઈલ ડિપાર્ટમેન્ટલ સેન્ટ્રો સ્ટોરમાં ભારતીય અને આંતરરાષ્ટ્રીય બ્રાન્ડ્સની ૩૦૦ થી વધુ વિવિધ શ્રેણીઓ હશે.  લૉન્ચને લઈને કંપની દ્વારા જારી કરવામાં આવેલા નિવેદનમાં કહેવામાં આવ્યું છે કે આ સ્ટોરમાં કપડાં, શૂઝ, મેકઅપ પ્રોડક્ટ્સ, મહિલાઓની અન્ય વસ્તુઓ ઉપરાંત સ્પોર્ટ્સ અને લગેજ એક્સેસરીઝ ઉપલબ્ધ હશે.

કંપનીના નિવેદનમાં કહેવામાં આવ્યું છે કે રિલાયન્સ સેન્ટ્રોને ગ્રાહકોની પસંદગીના આધારે ડિઝાઇન કરવામાં આવી છે અને તેમાં મધ્યમ અને પ્રીમિયમ સેગમેન્ટના ગ્રાહકો તેમની પસંદગીની દરેક વસ્તુ મેળવી શકશે.  રિલાયન્સ રિટેલ નવી બ્રાન્ડ્સ અને નવા સ્ટોર્સના ઉમેરા સાથે વિસ્તરણના માર્ગે છે.  આ ક્રમમાં સેન્ટ્રો સ્ટોર લોન્ચ કરવામાં આવ્યો છે.  ટૂંક સમયમાં આ ફોર્મેટના સ્ટોર્સની સંખ્યામાં વધારો થવાની ધારણા છે.
ખાસ વાત એ છે કે પહેલા સ્ટોરના લોન્ચિંગના અવસર પર કંપની અહીં ઉપલબ્ધ પ્રોડક્ટ્સ પર ભારે ડિસ્કાઉન્ટ પણ આપી રહી છે.

 આ અંતર્ગત ૩૯૯૯ રૂપિયાની ખરીદી પર ૧૫૦૦ રૂપિયાનું ડિસ્કાઉન્ટ આપવામાં આવી રહ્યું છે.  બીજી તરફ, જો તમે ૪૯૯૯ રૂપિયાની ખરીદી કરો છો, તો તમને કુલ ખરીદી પર ૨૦૦૦ રૂપિયાનું સીધું ડિસ્કાઉન્ટ આપવામાં આવી રહ્યું છે.

નોંધનીય છે કે ગયા મહિને રિલાયન્સ ઇન્ડસ્ટ્રીઝ લિમિટેડના ચેરમેન શ્રી મુકેશ અંબાણીએ જણાવ્યું હતું કે તેમની રિટેલ કંપની રિલાયન્સ રિટેલે બિઝનેસને વિસ્તારવા માટે અનેક ભાગીદારીમાં રૂ. ૯૭૦૦ કરોડથી વધુનું રોકાણ કર્યું છે.  કંપની જસ્ટ ડાયલ, સેવન-ઈલેવન, મિલ્કબાસ્કેટ, કલાનિકેતન અને રિતુ કુમાર સહિત અનેક કંપનીઓમાં રોકાણ ધરાવે છે.  

રિલાયન્સ રિટેલની યોજનાઓ વિશે વાત કરીએ તો, કંપનીએ નાણાકીય વર્ષ ૨૦૨૨માં કુલ ૨૫૦૦ નવા સ્ટોર્સ ખોલવાની તૈયારી કરી છે.  આ અંતર્ગત દરરોજ લગભગ ૭ નવા સ્ટોર ખોલવામાં આવશે.