Gujarati News

Gujarati News

News of Wednesday, 25th May 2022

અમદાવાદમાં ipl ની પ્‍લેઓફ- ફાઈનલ માટે જડબેસલાક સુરક્ષા

કલોઝીંગ સેરેમેનીમાં એ.આર.રહેમાન- અક્ષયકુમાર- રણવીરસિંહ- આમિર ખાન જમાવટ કરશે : ૯ ડીસીપી, ૧૩ એસીપી, ૪૮ પી.આઈ., ૧૨૭ પીએસઆઈ, ૨૮૩૦ પોલીસ કોન્‍સ્‍ટેબલ અને ૧ હજાર હોમગાર્ડના જવાનો સ્‍ટેડિયમમાં તહેનાત રહેશેઃ ખાનગી સિકયુરીટીના ૪૦૦ કર્મચારીઓ પણ સતત ખડેપગે રહેશે

નવી દિલ્‍હીઃ અમદાવાદમાં એક લાખથી વધુ પ્રેક્ષકોની કેપેસિટી ધરાવતા ક્રિકેટ વિશ્વના સૌથી મોટા નરેન્‍દ્ર મોદી સ્‍ટેડિયમમાં આઈપીએલની શુક્રવારની પ્‍લે- ઓફ (કવોલિફાયર- ટૂ) અને ફાઈનલ મેચ પોલીસના અભેદ્ય સુરક્ષાચક્ર વચ્‍ચે રમાશે. ક્રિકેટરોથી લઈને પ્રેક્ષકો માટે ૪૦૦થી પણ વધુ ઉચ્‍ચ પોલીસ- કર્મચારીઓથી લઈને હોમગાર્ડ સુધીના જવાનો સ્‍ટેડિયમની અંદર અને બહાર તહેનાત રહેશે. ખાનગી સિકયોરિટીના ૩૦૦થી ૪૦૦ જેટલા કર્મચારીઓ સ્‍ટેડિયમમાં  ફરજ બજાવશે.

અમદાવાદમાં પહેલી જ વાર આઈપીએલની ફાઈનલ રમાવાની છે. અમદાવાદ શહેરના ડીસીપી (કન્‍ટ્રોલ) ડો.હર્ષદ પટેલે કહ્યું હતું કે ‘સુરક્ષાને ધ્‍યાનમાં લઈને અમદાવાદ પોલીસે જબરદસ્‍ત બંદોબસ્‍ત ગોઠવ્‍યો છે.'

બે મેચ માટે ૯ ડીસીપી, ૧૩ એસીપી, ૪૮ પોલીસ ઈન્‍સ્‍પેકટર, ૧૨૭ પીએઆઈ, ૨૮૩૦ પોલીસ કોન્‍સ્‍ટેબલ તેમજ ૧૦૦૦ હોમગાર્ડના જવાનો સ્‍ટેડિયમમાં ફરજ પર રહેશે. ક્રિકેટરો સહિત ટીમના સભ્‍યો, મેચ રેફરી, અમ્‍પાયર સહિતના મહાનુભાવો માટે અલગ- અલગ હોટેલો પર અલગથી પોલીસ સિકયોરીટી બંદોબસ્‍ત ગોઠવવામાં આવશે. ક્રિકેટરોની ટીમને એસ્‍કોર્ટ સાથે પોલીસ બંદોબસ્‍ત અપાશે. બોમ્‍બ સ્‍કવોડ અને ડોગ સ્‍કવોડથી સ્‍ટેડિયમની અંદર તેમ જ બહાર ચેકિંગ હાથ ધરાશે.

બોલીવુડના કલાકારો અને મ્‍યુઝિશ્‍યનના પર્ફોર્મન્‍સ સાથે આતશબાજી, લેસર શો સહિતના કાર્યક્રમો સાથે જબરજસ્‍ત કલોઝિંગ સેરેમની યોજાશે અને પ્રેક્ષકોને મેચની સાથે મ્‍યુઝિક મસ્‍તીનો ડબલ જલસો જોવા મળવાનો હોવાથી મેચની ઓનલાઈન તેમ જ સ્‍ટેડિયમ પરથી જ ટિકિટ મેળવવા માટે દોડધામ મચી છે.

કહેવાય છે કે કલોઝિંગના એક કલાકના કાર્યક્રમમાં બોલીવુડના મ્‍યુઝિશ્‍યન એ.આર. રહેમાન ઉપરાંત બોલીવુડ સ્‍ટાર રણવીર સિંહ, અક્ષયકુમાર તેમજ આમીર ખાન ઉપરાંત સાઉથના સ્‍ટાર રજનીકાંત પણ આવી શકે છે.

(3:15 pm IST)