Gujarati News

Gujarati News

News of Tuesday, 25th January 2022

૨ વર્ષના બાળકે મમ્મીના મોબાઇલમાંથી ઓર્ડર કરી દીધું ૧.૪ લાખનું ફર્નિચર

જ્યારે આ દંપતિના ઘરે ફર્નિચરની ડિલિવરી શરૂ થઇ ત્યારે તેઓ આશ્ચર્યમાં મૂકાઇ ગયા હતા

નવી દિલ્હી તા. ૨૫ : અત્યારના ટેકનોલોજીના યુગમાં નાના બાળકોમાં રમકડાની રમવાની જગ્યાએ મોબાઈલ રમવાનું ખાસ્સું આકર્ષણ જોવા મળી રહ્યું છે. ત્યારે બાળકોને મોબાઈલ રમવા આપતા માતા-પિતા માટે હવે એક આંખ ઉઘાડનારો કિસ્સો સામે આવ્યો છે. જેમાં એક દંપતિએ પોતાના ૨ વર્ષના બાળકને મોબાઈલ રમવા માટે આપતા તે બાળકે મમ્મીના ફોનમાંથી રૂપિયા ૧.૪ લાખના ફર્નિચરનો ઓર્ડર કરી દીધો હતો.

જોકે આ દંપતિને એ વાતની સહેજ પણ જાણ નહોતી કે તેના ૨ વર્ષના બાળકે ફોન રમતા-રમતા ઓનલાઈન ફર્નિચર ઓર્ડર કરી દીધું છે. જયારે આ દંપતિના ઘરે ફર્નિચરની ડિલિવરી શરૂ થઈ ત્યારે તેઓ આશ્ચર્યમાં મૂકાઈ ગયા હતા.

મળતી માહિતી મુજબ, આ ભારતીય દંપતિ હાલ અમેરિકામાં રહે છે અને તેમનો દીકરો ૨ વર્ષનો છે. સ્વાભાવિકરીતે ૨ વર્ષના આ બાળકને લખતા-વાંચતા નથી આવડતું પણ મોબાઈલ રમતા આવડે છે. વાત જાણે એમ છે કે આ દંપતિએ મોબાઈલ એપમાં શોપિંગ કાર્ટમાં ઘણાં ફર્નિચર ઉમેરી રાખ્યા હતા અને ૨ વર્ષના દીકરાએ રમત-રમતમાં તે ફર્નિચર ઓર્ડર કરી દીધા હતા. ૨ વર્ષના દીકરાએ મોબાઈલ રમવા માટે માગતા તેના માતા-પિતાએ પોતાનો મોબાઈલ આપી દીધો હતો. ત્યારે બાળકે મોબાઈલ દ્વારા ફર્નિચરનો ઓર્ડર કરી દીધો હતો. દંપતિના મોબાઈલમાં બાય ડિફોલ્ટ ઘરનું સરનામું હતું જેના પર કંપની દ્વારા ઓર્ડર કરેલું ફર્નિચર એક પછી એક પછી એક પહોંચાડવાનું શરૂ કરાયું હતું.

૨ વર્ષના આ નાનકડા બાળકે તેના માતા-પિતા પાસેથી મોબાઈલ ફોનમાં સ્ક્રીન સ્વેપ અને ટેપ કરવાનું શીખી લીધું હતું. આ સમગ્ર ઘટના બાદ દંપતિએ પોતાના ફોનના સિકયોરિટી સેટિંગ વધુ મજબૂત કરી દીધા છે. ૨ વર્ષના આ બાળકની માતાનો ઈરાદો પોતાના નવા ઘર માટે થોડી વસ્તુઓ ખરીદવાનો જ હતો. પરંતુ તેમના પુત્રએ તેમના મોબાઈલ એપ કાર્ટમાંથી ઓર્ડર કરી દીધો.

(10:16 am IST)