Gujarati News

નવી દિલ્હી,તા.૨૩: આજના આધુનિક સમયમાં દિલ્હીના એક પોશ વિસ્તારમાં સ્થિત રેસ્ટોરેન્ટ એ સ્ત્રીઓના પારંપરિક પહેરવેશ સાડીની વ્યાખ્યા બદલતા એને જુનવાણી વેશ ગણાવ્યો છે. આ રેસ્ટોરેન્ટમાં એક મહિલાને એટલા માટે પ્રવેશ ના મળ્યો કારણ કે એણે સાડી પહેરી હતી. સાડી પહેરીને આવેલી મહિલા કર્મચારી કર્મચારીને સવાલ કરી રહી છે કે રેસ્ટોરેન્ટમાં સાડી પહેરીને આવવા પર પ્રતિબંધ છે? રેસ્ટોરેન્ટના કર્મચારીએ આપેલો જવાબ પૂરવાર કરે છે કે રેસ્ટોરેન્ટ સાડીને કેઝુઅલ ડ્રેસિંગ નથી માનતું અને માત્ર સ્માર્ટ કેઝુઅલને એન્ટ્રી મળી શકે છે.

હાલમાં આ ઘટનાનો વિડીયો સોશિયલ મીડિયા પર વાયરલ થઇ રહ્યો છે. જેની પર લોકો ભારે ગુસ્સો વ્યકત કરી રહ્યા છે. આ વિડીયો કિલપમાં સાંભળી શકાય છે કે, જયારે સાડી પહેરીને આવેલી મહિલાને એન્ટ્રીમાં જ રોકી દેવામાં આવે છે ત્યારે એ મહિલા એનો લેખિતમાં જવાબ માંગે છે. મહિલા કહી રહી છે કે રેસ્ટોરેન્ટ મેનેજમેન્ટ લખીને આપે કે અહીં સાડી પહેરીને આવવા પર પ્રતિબંધ છે.

આ વિડીયોને શેર કરતાં યુઝર લખે છે કે, કોણ નક્કી કરે છે કે સાડી સ્માર્ટ વિયર નથી? મે અમેરિકા, યુએઇ, યૂકેના સૌથી સારા રેસ્ટોરેન્ટમાં સાડી પહેરી છે. મને કોઇને રોકી નથી. જયારે ભારતમાં એક રેસ્ટોરેન્ટ ડ્રેસ કોડના આધારે નક્કી કરે છે કે સાડી સ્માર્ટ કેઝુઅલ નથી. આ વિચિત્ર છે.

અન્ય એક યુઝરે લખ્યું છે કે, સ્માર્ટ પહેરવેશ શું છે. ઇસાઇ, મુસ્લિમ દેશોમાં પણ સાડી પહેરવા પર પ્રતિબંધ નથી, તો ભારતમાં આવી માન્યતા કેમ છે.

બીજા એક યુઝરે આ વિડીયોને ટ્વીટ કરતાં ગૃહ મંત્રી અમિત શાહ અને મહિલા આયોગને પણ ટેગ કરતાં સવાલ કર્યો છે કે શુ સાડી પહેરવાનું છોડી દેવુ જોઇએ!