News of Saturday, 22nd January 2022
વોશિંગ્ટન, તા.૨૨: ગુરુવારે યુનાઇટેડ સ્ટેટ્સ-કેનેડા બોર્ડર પર એક ભારતીય પરિવારના હોવાનું મનાતા ચાર સભ્યો મૃત હાલતમાં મળી આવ્યા હતા. જે અમેરિકાની ઉત્તરીય સરહદેથી આકરા શિયાળા દરમિયાન ગેરકાયદેસર રીતે અમેરિકામાં ઘુસણખોરી કરતા ભારતીય ઈમિગ્રાન્ટ તરફ ધ્યાન દોરે છે, તે પણ એવા સમયે જયારે યુએસનું ધ્યાન મોટાભાગે મેક્સિકો સાથેની તેની દક્ષિણ સરહદ પર કેન્દ્રિત છે. અમેરિકામાં ગેરકાયદે દ્યુસણખોરી કરવા માગતા એક પુરૂષ, એક મહિલા, એક કિશોર અને એક નવજાતનો સમાવેશ થતો પરિવાર કે જેની ઓળખ હજુ સુધી થઈ શકી નથી, તે ભારતીયોના મોટા જૂથથી અલગ થઈ ગયા હોવાનું માનવામાં આવી રહ્યું છે. આ જૂથે માઈનસ ૩૫ ડિગ્રી સેલ્સિયસ તાપમાનમાં અમેરિકા-કેનેડાની સરહદ પાર કરી હતી. તેમના મૃતદેહો કેનેડાની બાજુએ યુએસ સરહદની એક મીટરની અંદર મળી આવ્યા હતા.
આ કમનસીબ દુર્ઘટનાના સૌથી નજીકના અધિકારક્ષેત્ર મિનેસોટામાં દાખલ કરાયેલા કોર્ટ દસ્તાવેજોમાં ઓથોરિટીએ જણાવ્યું હતું કે યુએસ બોર્ડર પેટ્રોલિંગે સ્ટીવ શેન્ડ નામના ફ્લોરિડાના રહેવાસી દ્વારા ચલાવવામાં આવતી સફેદ રંગની ૧૫ વ્યક્તિઓની પેસેન્જર વાનને અટકાવી હતી-જેને ગેરકાયદેસર રીતે વિદેશી નાગરિકોની દ્યુસણખોરી કરતા સ્મગલર તરીકે વર્ણવવામાં આવ્યો હતો - જે બાદ એક માઇલના અંતરે જ ગ્રામીણ વિસ્તારમાં સરહદની દક્ષિણે બે મુસાફરો મળી આવ્યા હતા જે અમેરિકામાં આવેલા ગેરકાયેદસર ભારતીય નાગરિક હોવાનું જણાયું હતું. ત્યારબાદ ઓથોરિટીને સરહદની નજીક વધુ પાંચ ભારતીય લોકો મળ્યા અને તેઓ કોઈના દ્વારા તેમને પિકઅપ કરવાની રાહ જોઈ રહ્યા હતા. એટલું જ નહીં લગભગ ૧૧ કલાકથી ભારે ઠંડીની સ્થિતિમાં તેઓ ચાલતા હતા. જૂથના સભ્યોમાંના એક પાસે એક બેકપેક હતું જેમાં નવજાતનો સામાન હતો - કપડાં, એક ડાયપર, રમકડાં. તપાસ કરતા બહાર આવ્યું કે તે ચાર વ્યક્તિના પરિવાર માટે આ સામાન પોતાની સાથે લઈને ચાલી રહ્યો હતો. જેઓ રાત્રે ભારે હિમવર્ષા દરમિયાન અલગ થઈ ગયા હતા. બાદમાં આ પરિવાર યુએસ બોર્ડરથી ૩૦ ફૂટ દૂર થીજી ગયેલો જોવા મળ્યો હતો.
મેનિટોબામાં એક કેનેડિયન અધિકારીએ પત્રકારોને જણાવ્યું હતું કે ઙ્કઅમે ખૂબ જ ચિંતિત છીએ કે આ બોર્ડર ક્રોસિંગનો પ્રયાસ કેટલો દુઃખદ રહ્યો હશે અને આ વ્યક્તિઓ, જેમાં એક નવજાત પણ છે તેમને ભારે હિમવર્ષા વચ્ચે પોતાના હાલ પર છોડી દેવામાં આવ્યા હતા, જયારે બહાર માઈનસ ૩૫ ડિગ્રી સેલ્સિયસ જેટલી આકરી ઠંડી હતી. આ ભોગ બનનારાએ માત્ર ઠંડા હવામાનનો જ નહીં પણ કાતીલ પવનો વચ્ચે કેટલાય કિમીના લાંબા વિસ્તાર, મોટા બરફના પ્રવાહો અને સંપૂર્ણ અંધકારનો પણ સામનો કર્યો હતો. અધિકારીએ આ ઘટનાને ‘હૃદયદ્રાવક દુર્દ્યટના' ગણાવી હતી. યુ.એસ. એટર્નીની ઓફિસે શેન્ડ પર જાણતા કે અવિચારી રીતે અમેરિકાના કાયદાની અવગણના કરવાનો આરોપ મૂક્યો છે અને અમેરિકામાં ગેરકાયદેસર રીતે દ્યુસણખોરી કરાવવી, આશ્રય આપવો સહિતના આરોપ મૂકવામાં આવ્યા છે. કોર્ટના દસ્તાવેજો જણાવે છે કે પકડાયેલા તમામ વિદેશી નાગરિકો ગુજરાતી બોલતા હતા અને મોટા ભાગના લોકોની અંગ્રેજી બોલવાની ક્ષમતા ખૂબ જ મર્યાદિત અથવા ઓછી હતી.
મહત્વનું છે કે સેંકડો ભારતીયો મોટાભાગે પંજાબ અને ગુજરાતના લોકો મેક્સિકો સાથેની દક્ષિણ સરહદેથી અમેરિકામાં પ્રવેશવાનો પ્રયાસ કરે છે અને દ્યણીવાર લેટિન અમેરિકાના સુક્કાભઠ્ઠ રણમાં સેંકડો કિમી ચાલે છે. પરંતુ તાજેતરમાં ઓછી રક્ષિત અમેરિકા કેનેડાની સરહદેથી ઘૂસણખોરીનું પ્રમાણ વધ્યું છે. જયાં ભૂપ્રદેશ અને હવામાનની સ્થિતિ તદ્દન અલગ છે. જોકે ઓથોરિટીએ જણાવ્યું હતું કે પકડાયેલા ભારતીયોએ હૂંફાળા કપડા પહેર્યા હતા, પરંતુ તે અહીંના ક્રૂર શિયાળા સામે રક્ષણ આપવા માટે પૂરતા ન હતા. આ વખતે અમેરિકામાં શિયાળો ખૂબ જ ઠંડો છે અને તેના કારણે વોશિંગ્ટન ડીસીમાં પણ માઈનસ ૧૧ ડિગ્રી તાપમાન જોવા મળી રહ્યું છે.
.png)
છેલ્લા 8 દિવસમાં સૌથી લોકપ્રિય
સૌરાષ્ટ્ર કચ્છ
સમાચાર ગુજરાત
દેશ-વિદેશ
ખેલ-જગત
ફિલ્મ જગત