Gujarati News

નવી દિલ્‍હી : દેશમાં એમ્‍પ્‍લોઈઝ પ્રોવિડન્‍ટ ફંડ ઓર્ગેનાઈઝેશન (EPFO) હેઠળ સંગઠિત ક્ષેત્રમાં રોજગારમાં વધારો થયો છે. એ-લિ ૨૦૨૨માં EPFO નેટમાં ૧૭.૦૮ લાખ સભ્‍યો ઉમેરાયા. માર્ચમાં ૧૨.૭૬ લાખ સભ્‍યોની સરખામણીમાં આ સંખ્‍યા ૩૪ ટકા વધુ છે. સોમવારે જારી કરાયેલા એક નિવેદનમાં, શ્રમ મંત્રાલયે જણાવ્‍યું હતું કે પગાર કર્મચારીઓ (પેરોલ) પર EPFO ડેટા અનુસાર, એપ્રિલ ૨૦૨૨ માં ચોખ્‍ખા ૧૭.૦૮ લાખ સભ્‍યો ઉમેરવામાં આવ્‍યા હતા.
નિવેદન અનુસાર વાર્ષિક ધોરણે એપ્રિલ ૨૦૨૧ની સરખામણીએ એપ્રિલ ૨૦૨૨માં ૪.૩૨ લાખ સભ્‍યોનો વધારો થયો છે. ગયા વર્ષે એપ્રિલ દરમિયાન નેટ ૧૨.૭૬ લાખ સભ્‍યો ઉમેરાયા હતા. ડેટા દર્શાવે છે કે નાણાકીય વર્ષ ૨૦૨૧-૨૨માં નવા સભ્‍યોનો ચોખ્‍ખો ઉમેરો વધીને ૧.૨૨ કરોડ થયો છે. તે ૨૦૨૦-૨૧માં ૭૭.૦૮ લાખ, ૨૦૧૯-૨૦માં ૭૮.૫૮ લાખ અને ૨૦૧૮-૧૯માં ૬૧.૧૨ લાખ હતી.
એપ્રિલ મહિના દરમિયાન ઉમેરાયેલા કુલ ૧૭.૦૮ લાખ સભ્‍યોમાંથી, લગભગ ૯.૨૩ લાખ સભ્‍યો પ્રથમ વખત કર્મચારી ભવિષ્‍ય નિધિ (EPF) અને વિવિધ જોગવાઈઓ અધિનિયમ, ૧૯૫૨ ના સામાજિક સુરક્ષા કવચ હેઠળ આવ્‍યા હતા. વય-આધારિત પેરોલ ડેટા અનુસાર, એપ્રિલ ૨૦૨૨ દરમિયાન સૌથી વધુ વધારો ૨૨-૨૫ વર્ષની વય જૂથમાં થયો હતો. આ દરમિયાન ૪.૩૦ લાખ સભ્‍યો જોડાયા હતા. તે પછી ૩.૭૪ લાખની સંખ્‍યા સાથે ૨૯-૩૫ વય જૂથનો નંબર આવે છે.   
ડેટા મુજબ મહારાષ્‍ટ્ર, કર્ણાટક, તમિલનાડુ, ગુજરાત, હરિયાણા અને દિલ્‍હી આગળ છે. આ રાજ્‍યોએ એપ્રિલ ૨૦૨૨ દરમિયાન કુલ ૧૧.૬૦ લાખ સભ્‍યો ઉમેર્યા હતા. તે જ સમયે, એપ્રિલમાં મહિલાઓની ચોખ્‍ખી સંખ્‍યા ૩.૬૫ લાખ હતી. EPFO એપ્રિલ ૨૦૧૮ થી પેરોલ ડેટા જાહેર કરી રહ્યું છે. આમાં સપ્‍ટેમ્‍બર ૨૦૧૭ પછીના ડેટાનો સમાવેશ થાય છે.